'सिंधुताई माझी माई' मालिकेत मोठ्या चिंधीची भूमिका साकारणार ही अभिनेत्री

Sindhutai Mazi Mai : सिंधुताई माझी माई मालिका उत्कंठावर्धक वळणावर आली आहे. ही मालिका लवकरच काही वर्षांचा लीप घेणार आहे.

कलर्स मराठीवरील सिंधुताई माझी माई मालिका उत्कंठावर्धक वळणावर आली आहे. ही मालिका लवकरच काही वर्षांचा लीप घेणार आहे. या मालिकेत चिंधीचा प्रवास आता सिंधू पर्यंत जाऊन पोहोचणार आहे. त्यामुळे अनेक बदल या मालिकेत घडून आलेले पाहायला मिळणार आहेत. आतापर्यंत या मालिकेत चिंधीच्या शिक्षणाबद्दलचा प्रवास अनुभवला त्यात तिला तिच्या वडिलांची साथ मिळाली होती. बालकलाकार अनन्या टेकवडे हिने चिंधीची भूमिका केली होती. योगिता चौक, प्रिया बेर्डे, किरण माने यांनी या मालिकेत महत्वपूर्ण भूमिका साकारल्या आहेत. त्यात आता चिंधीच्या सासूच्या भूमिकेत विद्या सावळे यांची एन्ट्री झाली आहे तर अतुल आगलावे पुन्हा एकदा प्रमुख भूमिकेत पाहायला मिळत आहे. दरम्यान आता मालिकेत मोठ्या चिंधीची एन्ट्री होणार आहे. आता ही भूमिका कोण साकारणार आहे, हे जाणून घेण्यासाठी प्रेक्षक उत्सुक आहेत.

कलर्स मराठी वाहिनीने सोशल मीडियावर एक प्रोमो शेअर केला आहे. ज्यात मालिकेतली चिंधी आता मोठी झाली आहे. तिची एक पुसटशी झलक पाहायला मिळत आहे. त्यामुळे चेहरा लपवलेली ही चिंधी अर्थात सिंधू नक्की आहे तरी कोण? असा प्रश्न प्रेक्षकांना पडला आहे.काहींना ती अभिनेत्री दीप्ती लेलेसारखी वाटत आहे. तर काहींच्या मते ही अभिनेत्री शिवानी सोनार आहे असा शिक्कामोर्तब केला आहे. पण जर हा फोटो तुम्ही नीट पाहिला आले तर या चेहऱ्याशी शिवानी सोनारचा चेहरा मिळताजुळता वाटत आहे. त्यामुळे सिंधुताईंच्या भूमिकेत आता तुम्ही शिवानी सोनारलाच पाहणार आहेत हे निश्चित सांगितले जात आहे.

शिवानी सोनार सिंधुताईंची व्यक्तिरेखा उत्तम निभावू शकते हे तिच्या अभिनयाने दाखवून दिले आहे. राजा राणीची गं जोडी या मालिकेतून शिवानीने तिच्या सहजसुंदर अभिनयाने प्रेक्षकांची मनं जिंकून घेतली होती. या मालिकेनंतर शिवानी पुन्हा एकदा कलर्स मराठीवरील मालिकेतूनच प्रमुख भूमिका साकारताना दिसणार आहे.

अतुल आगलावे सोबत ती प्रथमच प्रमुख भूमिका साकारत आहे त्यामुळे या दोघांची केमिस्ट्री कशी जुळून येते हे पाहण्यासाठी प्रेक्षक नक्कीच उत्सुक आहेत. दरम्यान ही एवढी मोठी व्यक्तिरेखा साकारण्याची संधी मिळत असल्याने शिवानी सोनार खूपच उत्सुक आहे.