'तू भेटशी नव्याने' मालिकेतील अभिनेत्रीचा थाटामाटात पार पडला लग्नसोहळा, फोटो आले समोर

२६ नोव्हेंबर रोजी अभिनेता अभिषेक गावकरने रिल स्टार सोनाली गुरवसोबत लग्नगाठ बांधली. त्यानंतर आता आणखी एका अभिनेत्रीने लग्न केल्याचे समोर आले आहे.

सध्या मराठी सिनेइंडस्ट्रीत लग्नाचे वारे वाहताना दिसत आहेत. अलिकडेच निखिल राजेशिर्के, किंशुक वैद्य यांचे लग्न झाले आणि त्यांच्या लग्नाचे फोटो सोशल मीडियावर पाहायला मिळाले. त्यानंतर २६ नोव्हेंबर रोजी अभिनेता अभिषेक गावकरने रिल स्टार सोनाली गुरवसोबत लग्नगाठ बांधली. त्यानंतर आता आणखी एका अभिनेत्रीने लग्न केल्याचे समोर आले आहे. सोनी मराठी वाहिनीवरील लोकप्रिय मालिका तू भेटशी नव्यानेमधील अभिनेत्री निकिता घाग विवाहबंधनात अडकली आहे. 

 सोनी मराठीवरील तू भेटशी नव्याने या मालिकेत नायिकेची मैत्रीण अन्नूची भूमिका अभिनेत्री निकिता घाग हिने साकारलेली पाहायला मिळते. तू भेटशी नव्याने या मालिकेतून निकिताला अभिनयाची मोठी संधी मिळाली आहे. निकिताचा गेल्या महिन्यात २१ ऑक्टोबर रोजी साखरपुडा झाला होता. २६ नोव्हेंबर २०२४ रोजी अभिनेत्री निकिता घाग आणि युवराज सिंगासने विवाहबंधनात अडकले. त्यांच्या लग्नाचे फोटो सोशल मीडियावर पाहायला मिळत आहेत.

निकिता घागने रिसेप्शनचा फोटो सोशल मीडियावर शेअर करत लिहिले की, ५ वर्षांची तपस्या पूर्ण झाली. शुभमंगल सावधान. या फोटोत पाहायला मिळत आहे की, तिने रिसेप्शनला लाल रंगाचा शालू नेसला होता आणि त्यात ती खूपच सुंदर दिसते आहे. तिच्या या फोटोंवर शुभेच्छांचा वर्षाव होताना दिसत आहे.

निकिता घाग हिने ठाण्यातील ज्ञान साधना कॉलेजमध्ये असताना नाटकातून सहभाग घेतला होता. नाट्यस्पर्धा, एकांकिकेतून निकिताला उत्कृष्ट अभिनयाची पारितोषिकं मिळाली आहेत. फ्लाईंग राणी या नाटकातील भूमिकेसाठी सर्वोत्कृष्ट अभिनेत्री म्हणून तिला झी गौरव पुरस्काराने गौरविण्यात आले होते. गाथा नवनाथांची, राणी मी होणार अशा मालिकेतून निकीताने छोट्या मोठया भूमिका साकारलेल्या आहेत.