'तू ही रे माझा मितवा' नव्या मालिकेचा हटके प्रोमो चर्चेत, 'गुंजा' फेम अभिनेत्री मुख्य भूमिकेत

आणखी एका नव्या मालिकेची घोषणा स्टार प्रवाहकडून करण्यात आली आहे. 'तू ही रे माझा मितवा'  असं मालिकेचं नाव असून याचा प्रोमो नुकताच प्रदर्शित करण्यात आला आहे. 

येत्या काही दिवसांत अनेक नवीन मालिका प्रेक्षकांच्या भेटीला येणार आहेत. स्टार प्रवाहने मालिकांचा खजिनाच जणू प्रेक्षकांच्या भेटीला आणला आहे. 'आई आणि बाबा रिटायर्ड होत आहेत', 'लग्नानंतर होईलच प्रेम' या नव्या मालिका प्रेक्षकांच्या भेटीला येणार आहेत. आता आणखी एका नव्या मालिकेची घोषणा स्टार प्रवाहकडून करण्यात आली आहे. 'तू ही रे माझा मितवा'  असं मालिकेचं नाव असून याचा प्रोमो नुकताच प्रदर्शित करण्यात आला आहे. 

'तू ही रे माझा मितवा'  मालिकेत 'गुंजा' फेम अभिनेत्री शर्वरी जोग आणि अभिनेता अभिजीत आमकर मुख्य भूमिकेत दिसणार आहेत. या मालिकेच्या प्रोमोमध्ये अभिजीत फॅशन डिजायनर स्टुडिओचा मालक असल्याचं दिसत आहे. त्याच्या कंपनीत शर्वरी काम करण्यासाठी येते. टीमने तयार केलेले सगळे आऊटफिट अभिजीत रिजेक्ट करत असल्याचं या प्रोमोमध्ये दिसत आहे. तर ऑफिसच्या पहिल्याच दिवशी शर्वरीला उशीर झाल्याचं प्रोमोमध्ये पाहायला मिळत आहे. शर्वरी आणि अभिजीतची हटके लव्हस्टोरी या मालिकेतून प्रेक्षकांना दिसणार आहे. 

स्टार प्रवाहवरील या नव्या मालिकेचा प्रोमो प्रेक्षकांच्याही पसंतीस उतरला आहे. या मालिकेसाठी प्रेक्षकही उत्सुक आहेत. २३ डिसेंबरपासून ही मालिका प्रेक्षकांच्या भेटीला येणार आहे. रात्री १०.३० वाजता ही 'तू ही रे माझा मितवा'  ही मालिका प्रेक्षकांना पाहता येणार आहे. 

'तू ही रे माझा मितवा'  मालिकेत शर्वरी ईश्वरी देसाई ही भूमिका साकारताना दिसणार आहे. याआधी शर्वरीने 'गुंजा' मालिकेतून प्रेक्षकांची मनं जिंकली होती. तर अभिजीतने काही सिनेमांमध्ये काम केलं आहे. 'टकाटक' या चित्रपटात तो मुख्य भूमिकेत होता. या सिनेमाने त्याला लोकप्रियता मिळवून दिली. आता 'तू ही रे माझा मितवा'  मालिकेतून तो प्रेक्षकांच्या भेटीला येत आहे.