सत्यवान सावित्री: 'हा' प्रसिद्ध अभिनेता साकारणार सत्यवानाची भूमिका

Satyavan Savitri:येत्या १२ जून पासून छोट्या पडद्यावर सत्यवान सावित्री ही नवी मालिका प्रेक्षकांच्या भेटीला येत आहे.

छोट्या पडद्यावर सध्याच्या घडीला अनेक नवनवीन प्रयोग केले जात आहेत. त्यामुळे आतापर्यंत अनेक धाटणीच्या पौराणिक, ऐतिहासिक मालिका प्रेक्षकांच्या भेटीला आल्या. यामध्येच आता सत्यवान सावित्री ही मालिका प्रेक्षकांच्या भेटीला येऊ घातली आहे. ज्या प्रेमापुढे मृत्यूनेही हात टेकले अशा सत्यवान सावित्रीची कथा लवकरच पडद्यावर उलगडली जाणार आहे. या मालिकेत अभिनेता आदित्य दुर्वे मुख्य भूमिका साकारत असून त्याने या भूमिकेविषयीचा त्याचा अनुभव शेअर केला आहे.

येत्या १२ जून पासून छोट्या पडद्यावर सत्यवान सावित्री ही नवी मालिका प्रेक्षकांच्या भेटीला येत आहे. या मालिकेत संयमी, सौम्य आणि शूर जंगलपुत्र अशी 'सत्यवान' यांची भूमिका अभिनेता आदित्य दुर्वे साकारणार आहे. 

"पौराणिक मालिकेत काम करणं हे माझ्यासाठी खूप आव्हानात्मक होतं. मी याबद्दल कधी विचार नव्हता केला. पण ऑडिशननंतर जेव्हा मालिकेत माझी निवड झाल्याचं मला कळलं तेव्हा मला खूप आनंद झाला, पण त्याचसोबत नर्व्हसदेखील झालो होतो. सगळ्या टीमने माझी खूप मदत केली आहे. या मालिकेत एक वेगळीच बोलीभाषा ऐकायला मिळेल. ही भाषा मी पूर्वी कधीच ऐकली नव्हती. पण ती ऐकताना जितकी गोड वाटते तितकीच बोलताना कठीण आहे. जवळपास १०-१२ दिवस सराव केल्यानंतर मला ती भाषा बोलता येऊ लागली, असं आदित्य म्हणाला.

पुढे तो म्हणतो, सत्यवान हा एक लाकूडतोड्या होता त्यामुळे त्याची शरीरयष्टी कशी असेल याचा विचार करून मी माझ्या देहबोली आणि शरीरयष्टीवर देखील लक्ष दिला. जेव्हा प्रेक्षक या मालिकेचा पहिला भाग पाहतील तेव्हा त्यांच्या मनात असलेली सत्यवानाची प्रतिमा मी छोट्या पडद्यावर साकारली असेन अशी मला आशा आहे. कुठली भूमिका साकारताना त्या भूमिकेतील काही गुण हे आपल्यात येतात. सत्यवानाने कुठलीही गोष्ट एकदा ठरवली तर ती पूर्णत्वाला नेतो. सत्यवान हा सगळ्यांची काळजी घेणारा आहे. तसेच सत्यवानामधला सगळ्यात मोठा गुण म्हणजे ऐकीव गोष्टींवर नाही तर जे दिसतं त्याची खात्री करून सत्यवान गोष्टींवर विश्वास ठेवतो. हे सगळे गुण माझ्यामध्ये देखील हळूहळू आत्मसात होत आहेत."

दरम्यान, आदित्य मराठी कलाविश्वातील लोकप्रिय अभिनेता आहे. यापूर्वी त्याने अनेक मालिकांमध्ये काम केलं आहे.यात अलिकडेच तो 'सोन्याची पावलं' या मालिकेत झळकला होता.