'आधी दुसऱ्यांच्या जीवावर उडायचं मग गटार उघडून...'; जान्हवीने पॅडीची माफी मागितल्यावर उत्कर्ष भडकला

जान्हवीने बेताल वक्तव्य केल्याने पॅडीची हात जोडून माफी मागितली. पुढे बिग बॉसचा माजी स्पर्धक आणि गायक उत्कर्ष शिंदेने जान्हवीला चांगलंच सुनावलंय

बिग बॉस मराठीच्या नवीन सीझनची सध्या चांगलीच चर्चा आहे. बिग बॉसच्या घरात प्रत्येक दिवशी काहीतरी नवीन प्रकरण शिजताना दिसतं. या प्रकरणांची महाराष्ट्रभर चर्चा होते. अशातच बिग बॉस मराठीमध्ये दोन दिवसांपूर्वी मोठा राडा झाला. यावेळी जान्हवीने पॅडीच्या अभिनयाबद्दल टीका केली. जोकर आणि ओव्हरअॅक्टींग म्हणत पॅडीला जान्हवीने हिणवलं. काल तिने बिग बॉसच्या घरात पॅडीची माफीही मागितली. अशातच बिग बॉस मराठी ३ चा माजी स्पर्धक आणि गायक-अभिनेता उत्कर्ष शिंदेने जान्हवीला चांगलंच सुनावलंय. 

उत्कर्षने जान्हवीला सुनावले खडे बोल

उत्कर्ष लिहितो, "आधी दुसऱ्यांच्या जीवावर उडायचं. मध्येच कोंबडीसारखं फडफडायचं. मग गटार उघडून बडबडायचं. आणि मातीखाली आलं आहे हे कळाल्यावर मुळूमुळू रडायचं. कधी जाणार ही जान्हवी." अशी मोजक्या वाक्यांमध्ये पोस्ट करत उत्कर्षने जान्हवीला खडे बोल सुनावले आहेत. जान्हवीचा वक्तव्याचा महाराष्ट्रातील अनेक कलाकारांकडून तीव्र निषेध व्यक्त केला जातोय. 

 

जान्हवीने मागितली पॅडीची माफी

जान्हवी काल गार्डन एरियामध्ये आली होती. ती पॅडीला सॉरी म्हणाली. त्यावर पॅडी म्हणाला, "मला वाटलं कधीतरी हे बोलावं लागेल तुझ्याशी. माझ्यासमोर तर काही नाही झालं. मला असं ओझरता आवाज आला.  तेव्हा मी देवाकडे प्रार्थना केली होती की, तुला खूप मोठी अभिनेत्री बनव आणि तुला पुढे एवढा स्टँड घेता येईल की या माणसासोबत मी काम करणार नाही. हा माणूस जर प्रोजेक्टमध्ये असेल तर मी काम करणार नाही." जान्हवीने माफी मागितली असली तरीही तिने पॅडीच्या अभिनयाचा अपमान केल्याने तिच्याविरुद्ध सर्वांनी राग व्यक्त केलाय