​जेलमधून बाहेर पडताच अलका कौशलने सुरू केले वो अपना साचे चित्रीकरण

छ�

��ट्या पडद्यावरील प्रसिद्ध अभिनेत्री अलका कौशलला पंजाबच्या संगरूर न्यायालयाने चेक बाउन्सप्रकरणी दोन वर्षांची शिक्षा सुनावली होती. अलकाबरोबर तिची आई सुशीला बडोलादेखील ही शिक्षा सुनावण्यात आली होती. ५० लाखांचा चेक बाऊन्स झाल्याप्रकरणी त्या दोघांना शिक्षा झाली होती. पण आता अलकाची तुरुंगातून सुटका झाली असून तिने पुन्हा चित्रीकरणाला सुरुवात केली आहे. वो अपना सा या मालिकेत अलका नायकाच्या आईची भूमिका साकारत होती. जेलमधून बाहेर पडल्यानंतर तिने आता या मालिकेच्या चित्रीकरणाला पुन्हा सुरुवात केली असून या मालिकेत तिची ग्रँड एंट्री दाखवण्यात येणार आहे. 
वो अपना सा या मालिकेच्या चित्रीकरणाचे काही फोटो नुकतेच समोर आले आहेत. या फोटोंमध्ये आपल्याला अलकासोबत सुदीप साहिर आणि दिशा परमार दिसत आहेत. सुदीप या मालिकेत अर्जुनची तर दिशा या मालिकेत जियाची भूमिका साकारत आहे. 
लागडिया गावातील रहिवासी अवतार यांच्याकडून एका मालिकेची निर्मिती करण्यासाठी अलका आणि तिच्या आईने ५० लाख रुपये उसने घेतले होते. मात्र बरेच दिवस उलटून गेल्यानंतर अलकाकडून पैसे मिळाले नसल्याने अवतारने तिच्याकडे पैशांची मागणी केली. त्यावेळी अलकाने २५-२५ लाखांचे दोन धनादेश दिले. मात्र हे दोन्ही चेक बाऊन्स झाले. त्यामुळे त्याने थेट मालेरकोटरा पोलीस ठाण्यात दोघींविरुद्ध गुन्हा दाखल केला. पुढे अलका आणि तिची आई जामिनावर सुटल्यानंतर त्यांनी संगरूर न्यायालयात अपील केली. या अपीलच्या माध्यमातून आम्ही अवतारकडून पैसे घेतलेच नसल्याचा बनाव केला. परंतु जेव्हा याविषयी सखोल तपास करण्यात आला, तेव्हा त्यामध्ये अलका आणि तिची आई सुशीलाने अवतारकडून पैसे घेतल्याचा उलगडा झाला. पोलिसांनी दिलेल्या पुराव्यांच्या आधारे न्यायालयाने अलका आणि तिची आई सुशीला यांना दोन वर्षांची शिक्षा सुनावली.  
अलका कौशलने स्वरागिनी, कबूल है, नया दौर, सरोजनी यांसारख्या अनेक मालिकांमध्ये काम केले आहे. तसेच सलमान खानची मुख्य भूमिका असलेल्या बजरंगी भाईजान या चित्रपटात तिने करिना कपूरच्या आईची भूमिका साकारली होती. तसेच अलकाने कंगना रानौतच्या क्वीनमध्येही महत्त्वपूर्ण भूमिका साकारली होती. अलका प्रसिद्ध अभिनेता वरुण बडोलाची बहीण आहे.