पुढील वर्षी येणार अजय देवगणच्या या चित्रपटाचा सीक्वल, ज्याने तोडले होते बॉलिवूडचे सर्व रेकॉर्ड

Ajay Devgan : अजय देवगणच्या सिंघम अगेनने बॉक्स ऑफिसवर धुमाकूळ घालत आहे. दरम्यान, आणखी एक मोठी बातमी समोर आली आहे की, अभिनेता त्याच्या चित्रपटाच्या सिक्वेलमध्ये दिसणार आहे ज्या सिनेमाने वर्षांपूर्वी जबरदस्त कलेक्शन केले होते.

रोहित शेट्टी (Rohit Shetty) आणि अजय देवगण(Ajay Devgan)ची जोडी सध्या बॉक्स ऑफिसवर धुमाकूळ घालत आहे. त्यांच्या 'सिंघम अगेन' (Singham Again Movie) या चित्रपटाने जगभरात ३०० कोटींची कमाई केली आहे. आता ही जोडी पुन्हा एकदा धुमाकूळ घालण्याच्या तयारीत आहे. मीडिया रिपोर्ट्सनुसार, अजय देवगण आणि रोहित शेट्टी यांनी पुष्टी केली आहे की त्यांचा पुढचा चित्रपट 'गोलमाल ५' (Golmal 5) असणार आहे. 

रोहित शेट्टी आणि अजय देवगण यांनी पिंकविलाशी बोलताना सांगितले की, सध्या कॉप युनिव्हर्समध्ये कोणत्याही चित्रपटापूर्वी पुढचा चित्रपट गोलमाल असेल. २००६ मध्ये जेव्हा गोलमाल रिलीज झाला तेव्हा कोणत्याही अभिनेता-दिग्दर्शकाला माहित नव्हते की हा चित्रपट बॉलिवूडच्या कल्ट कॉमेडी चित्रपटांपैकी एक बनेल. या फ्रँचायझीने अजय देवगणचे नशीब बदलले.

अजय देवगणने पहिल्यांदाच साकारली होती कॉमिक भूमिका

हा तोच चित्रपट आहे ज्याद्वारे अजय देवगण पहिल्यांदाच गंभीर भूमिकेतून बाहेर येऊन आपली कॉमिक शैली दाखवू शकला. नेहमी गंभीर चेहऱ्याने दिसणारा अजय देवगण कधी आनंदी 'गोपाल'च्या भूमिकेत दिसेल, असं याआधी कुणालाही वाटलं नव्हतं. यानंतर अजय देवगणचे अनेक हिट आणि फ्लॉप चित्रपट आले, परंतु या फ्रेंचाइजीचे शेवटचे चार चित्रपट सुपरहिट ठरले. या सीरिजचा शेवटचा चित्रपट 'गोलमाल अगेन' २०१७ मध्ये आला होता. अजय देवगणच्या करिअरमधला हा पहिलाच चित्रपट आहे ज्याने बॉक्स ऑफिसवर २०० कोटींहून अधिक कमाई केली आहे. यानंतर शैतान, तान्हाजी आणि आता सिंघम अगेनचाही या यादीत समावेश झाला आहे.