अपघातात सफाई कर्मचाऱ्याचा मृत्यू

देसाईगंज मुख्य रेल्वे फाटकाच्या पुढे कुरखेडा टी पार्इंटवर एका ट्रकने सायकलस्वाराला समोरासमोर धडक दिल्याने एक तरूण ठार झाल्याची घटना ...

देसाईगंज : देसाईगंज मुख्य रेल्वे फाटकाच्या पुढे कुरखेडा टी पार्इंटवर एका ट्रकने सायकलस्वाराला समोरासमोर धडक दिल्याने एक तरूण ठार झाल्याची घटना शुक्रवारी सकाळी ६.४५ वाजताच्या सुमारास घडली. संशोधन मेश्राम (२४) रा. सावंगी असे मृतक इसमाचे नाव आहे.देसाईगंज नगर पालिकेत साफसफाई कामावर रोजंदारी मजूर म्हणून कार्यरत असलेला संशोधन मेश्राम न.प.मध्ये कामावर येत होता. दरम्यान कुरखेडाकडून येणाऱ्या ट्रक डब्ल्यू. बी. ३३ सी ६९३३ ने कुरखेडा टी पार्इंट येथे संशोधनच्या सायकलला समोरून धडक दिली. यात सायकलस्वार बेशुध्द झाला. त्याला तरूणांनी ग्रामीण रूग्णालय देसाईगंज येथे उपचारासाठी हलविले. परंतु त्याच्या मेंदुला जबर दुखापत झाल्याने त्याची प्रकृती गंभीर होती. त्याला गडचिरोलीला रूग्णालयात हलविण्यात आले. परंतु त्याचा रूग्णालयात मृत्यू झाला, अशी माहिती डॉ. कोसे यांनी दिली आहे. ट्रकचालकाला पोलिसांनी ताब्यात घेतले असून अधिक तपास देसाईगंज पोलीस करीत आहे. १५ दिवसांपूर्वी देसाईगंज शहरात तिघांचा रस्ते अपघातात मृत्यू झाला होता. त्यानंतर अपघाताची ही मालिका सुरूच आहे. (तालुका प्रतिनिधी)