यंत्रणा सज्ज : सहा नगर पंचायतीत होणार रविवारी मतदानगडचिरोली : अहेरी विधानसभा क्षेत्रातील भामरागड, एटापल्ली, मुलचेरा, अहेरी, सिरोंचा या पाच नगर पंचायतीसह गडचिरोली विधानसभा क्षेत्रातील चामोर्शी नगर पंचायतसाठी १ नोव्हेंबर रोजी सकाळी ७.३० ते सायंकाळी ५.३० या वेळेत मतदान होणार आहे. ४८३ उमेदवार १०२ जागांसाठी निवडणूक लढत असून ४१ हजार ३३० मतदार या उमेदवारांचा फैसला करणार आहेत. सहाही नगर पंचायतीसाठी प्रत्येकी १७ मतदान केंद्र राहणार असून शनिवारी तहसील कार्यालयातून मतदान केंद्रावर पोलिंग पार्ट्या रात्री पाठविण्यात आल्या आहेत. दिवसभर मतदान कर्मचाऱ्यांना ईव्हीएम व इतर साहित्य वाटप करण्याचे काम करण्यात आले. संवेदनशील भागात मतदान केंद्रावर कडक बंदोबस्त राहणार असून चामोर्शी येथे १२ हजार ३२, मुलचेरा येथे १ हजार ३४७, अहेरी येथे ११ हजार ५३३, सिरोंचा येथे ६ हजार ७५०, एटापल्ली येथे ६ हजार ३२४, भामरागड येथे ३ हजार ३२४ असे एकूण ४१ हजार ३३० मतदार आपल्या मतदानाचा हक्क बजावतील. यात २० हजार ९६७ पुरूष व २० हजार ३६२ महिलांचा समावेश आहे. (जिल्हा प्रतिनिधी)
४१ हजार ३३० मतदार ठरविणार ४८३ उमेदवारांचे भवितव्य
By admin | Published: November 01, 2015 1:44 AM