सलूनची भिंत काेसळल्याने एकजण गंभीर जखमी

आलापल्ली येथील वीर बाबुराव चौकात बंदुकवार यांचे सलूनचे दुकान आहे. नेहमीप्रमाणे अनिल व राहुल बंदुकवार हे आपल्या दुकानात गिऱ्हाईकांची दाढी व कटिंग करीत होते. त्यावेळी भिंतीच्या बाजूला युवक सुनील राऊत व अन्य दाेघेजण बसले होते. सलूनच्या अगदी बाजूला शिवसेना उपजिल्हाप्रमुख धर्मा रॉय व प्रमोद मेश्राम यांच्या मालकीच्या जागेवर बांधकामासाठी सहा फूट खोल खड्डा मंगळवारी जेसीबी मशीनद्वारे खोदण्यात आला होता. हा खड्डा खोदताना सुरक्षित अंतर न राखल्यामुळे भिंतिवर दबाव पडून ती कोसळली. आजूबाजूला असलेल्या नागरिकांनी घटनास्थळी धाव घेऊन भिंतीखाली दबलेल्या जखमी युवकाला बाहेर काढण्यात आले. जखमी युवकाच्या मानेला व डोक्याला गंभीर दुखापत झाल्याने अहेरी उपजिल्हा रुग्णालयात उपचार करून चंद्रपूरला रेफर करण्यात आले. याबाबत माहिती मिळताच पोलीस उपनिरीक्षक बाळासाहेब शिंदे, जगन्नाथ मडावी यांनी घटनास्थळी पोहोचून पंचनामा केला.