पणजी: चिंबल -तिसवाडी येथे ट्रक ने बुलेटला दिलेल्या जोरदार धडकेत मेरशी येथील ३० वर्षीय युवक गोविंद नाईक हा जागीच ठार झाला. अपघाताची ही घटना १६ मे रोजी संध्याकाळी घडली.
याप्रकरणी जुने गोवे पोलिसांनी ट्रक चालक आनंद हळर्णकर (४१, गोवा वेल्हा) याला अटक केली आहे. या अपघात प्रकरणी पोलिसांनी गुन्हा नोंद केला असून ते पुढील तपास करीत आहेत.
जुने गोवे पोलिसांनी दिलेल्या माहितीनुसार अपघाताची ही घटना चिंबल येथील दातेश्वर कॉलनी नजिक संध्याकाळी ६.१५ वाजण्याच्या सुमारास घडली. संशयित चालक आनंद हळर्णकर हा आपला स्वराज ट्रक जीए ०७ टी ५५७९ घेऊन वेगाने चालवत होता. दातेश्वर कॉलनी येथे पोहचताच या ट्रकची जोरदार धडक त्याच रस्त्यावरुन जाणाऱ्या गोविंद नाईक हा युवक चालवत असलेला बुलेट क्रमांक जीए ०९ एन ९८१५ ला बसली. सदर धडक इतकी जबरदस्ती होती की गोविंद रस्त्यावर फेकला केला. यात तो गंभीर झाला. या अपघातात तो जागीच ठार झाला.