Goa Assembly Election 2022: आलेक्स रेजिनाल्डचा तृणमूल काँग्रेसला धक्का; पुन्हा स्वगृही परतण्याची शक्यता

आलेक्स रेजिनाल्ड लोरेन्स हे तृणमूल काँग्रेसमध्ये गेले तरी या पक्षात ते खुश नव्हते. तृणमूलची कार्यपद्धत त्यांच्या अंगवाणी पडली नाही.

मडगाव : काँग्रेसचा राजीनामा देऊन अलिकडेच तृणमूल काँग्रेसमध्ये दाखल झालेले कुडतरीचे माजी आमदार आलेक्स रेजिनाल्ड लोरेन्स यांनी रविवारी संध्याकाळी तृणमूल देत सर्वांना धक्का दिला आहे. ते पुन्हा काँग्रेसमध्ये परतण्याची शक्यता आहे.

विश्वसनीय सूत्रांकडून मिळालेल्या माहितीनुसार आलेक्स रेजिनाल्ड लोरन्स यांनी रविवारी संध्याकाळी कुडतरी येथे आपल्या निवासस्थानी आपले कार्यकर्ते व समर्थकांची बैठक घेतली. त्या बैठकीत तृणमूलला सोडचिठ्ठी देऊन त्यांनी पुन्हा काँग्रेस जावे अथवा अपक्ष निवडणूक लढवावी. तृणमूलच्या तिकिटावर लढू नये, असे ठरले. त्यानंतर रेजिनाल्ड यांनी तृणमूलच्या सदस्यपदाचा राजीनामा प्रदेश अध्यक्षांना पाठवून दिला. मात्र राजीनामा पत्रात त्यांनी राजीनामा देण्यामागचे कारण स्पष्ट केलेले नाही. या राजकीय घडामोडीनंतर रेजिनाल्ड यांच्याशी मोबाईलवरून संपर्क साधण्याचा प्रयत्न केला असता त्यांच्याशी संपर्क होऊ शकला नाही.

दरम्यान, याबाबत प्रतिक्रीया देताना कुडतरीचे सरपंच मिलाग्रीस रॉड्रिग्ज म्हणाले की, आलेक्स रेजिनाल्ड लोरेन्स यांनी काँग्रेस पक्षाचा राजीनामा देताना पंचायत मंडळाला विश्वासात घेतले नव्हते. तसेच तृणमूल काँग्रेसचा राजीनामा देतानाही विश्वासात घेतलेले नाही. सोशल मीडिया तसेच लोकांकडून समजते की, रेजिनाल्ड स्वगृही परतणार आहे. आलेक्स रेजिनाल्ड लोरेन्स काँग्रेसचा राजीनामा दिल्याने कुडतरी काँग्रेस गट मंडळाने जिल्हा सदस्य मोरेनो रिबेलो, त्यांच्या पत्नी, शालोम सार्दीन व जोझेफ वाझ यांची नावें उमेदवारीसाठी प्रदेशाध्यक्षांकडे पाठविली आहेत. त्या चौघापैकी एकाला उमेदवारी निश्चित मानली जात होती. मात्र आता रेजिनाल्ड पुन्हा कॉंग्रेसमध्ये आल्यास व त्याना उमेदवारी दिल्यास मतदार नाराज होउ शकतात असे मिलाग्रीस रॉड्रिग्ज यांनी सांगितले.

आलेक्स रेजिनाल्ड लोरेन्स हे तृणमूल काँग्रेसमध्ये गेले तरी या पक्षात ते खुश नव्हते. तृणमूलची कार्यपद्धत त्यांच्या अंगवाणी पडली नाही. त्यामुळेच त्यानी तृणमूल सोडसण्याची शक्यता वर्तवण्यात येत आहे. तसेच अलिकडेच भाजपातून काँग्रेसमध्ये प्रवेश केलेल्या उत्तर गोव्यातील एका राजकारण्याने रेजिनाल्ड याना स्वगृही परतण्याचे तसेच काँग्रेसची उमेदवारी देण्याचे आश्वासन दिल्याने रेजिनाल्ड माघारी फिरले असावेत. अशी चर्चा कुडतरी मतदारसंघात सुरू आहे.