पणजीतील विजयाची परंपरा कायम राखण्यासाठी भाजपाचे शर्थीचे प्रयत्न

मनोहर पर्रीकर यांच्या हयातीत एकदा देखील पणजी विधानसभा मतदारसंघात पराभूत न झालेल्या भारतीय जनता पक्षाने यावेळी पणजीतील विजयाची आपली परंपरा कायम ठेवण्यासाठी शर्थीचे प्रयत्न चालविले आहेत

ठळक मुद्देमनोहर पर्रीकर यांच्या हयातीत एकदा देखील पणजी विधानसभा मतदारसंघात पराभूत न झालेल्या भारतीय जनता पक्षाने यावेळी पणजीतील विजयाची आपली परंपरा कायम ठेवण्यासाठी शर्थीचे प्रयत्न चालविले आहेत.पणजीत जिंकायलाच हवे अशा इर्षेने भाजपा लढत आहे. विशेषत: मुख्यमंत्री डॉ. प्रमोद सावंत यांनी पणजीतील लढत ही स्वत: साठी अतिशय प्रतिष्ठेची बनवली आहे.

पणजी : मनोहर पर्रीकर यांच्या हयातीत एकदा देखील पणजी विधानसभा मतदारसंघात पराभूत न झालेल्या भारतीय जनता पक्षाने यावेळी पणजीतील विजयाची आपली परंपरा कायम ठेवण्यासाठी शर्थीचे प्रयत्न चालविले आहेत. पणजीत जिंकायलाच हवे अशा इर्षेने भाजपा लढत आहे. विशेषत: मुख्यमंत्री डॉ. प्रमोद सावंत यांनी पणजीतील लढत ही स्वत: साठी अतिशय प्रतिष्ठेची बनवली आहे.

पणजी हा पंचवीस वर्षे भाजपाचा बालेकिल्ला बनून राहिला. गोव्यातील चाळीसपैकी एकही मतदारसंघ असा पंचवीस वर्षे बालेकिल्ला कधी बनून राहिला नाही. फक्त पणजीचाच अपवाद आहे. 1994 सालापासून पणजी मतदारसंघात मनोहर पर्रीकर सातत्याने जिंकत आले. त्यांनी पणजीत जिंकण्याचा विक्रमच केला. पर्ये मतदारसंघात काँग्रेसचे प्रतापसिंग राणे कधीच पराभूत झाले नाहीत आणि पणजीत पर्रीकर कधी हरले नाहीत. मात्र यावेळी पर्रीकर हयात नसताना प्रथमच भाजपा पणजीत निवडणुकीस सामोरा जात आहे. यामुळे स्थिती थोडी वेगळी आहे. पर्रीकर यांची उणीव भरून काढण्यासाठी भाजपाने पर्रीकर यांच्या दोन्ही पुत्रांना पणजीत प्रचार काम करण्यास सांगितले. त्यामुळे उत्पल आणि अभिजात हे दोन्ही पुत्र प्रचार काम करत आहेत. रायबंदर व मळा या भागात हे दोघेही फिरून भाजपाच्या कार्यकर्त्यांच्या गाठीभेटी घेत आहेत. काही अतिशय जुने कार्यकर्तेही मनोहर पर्रीकर यांची आठवण काढतात तेव्हा पर्रीकर यांच्या मुलांना गहीवरून येते.

येत्या 19 रोजी पणजीसाठी मतदान होणार आहे. पणजीत काँग्रेसतर्फे माजी मंत्री बाबूश मोन्सेरात हे लढत आहेत. मोन्सेरात हे एकदा पणजीत पराभूत झालेले आहेत पण यावेळी प्रथमच ते काँग्रेसच्या तिकीटावर लढत आहेत. पणजीत मतदारांची एकूण संख्या बावीस हजार आहे व त्यात साडेसहा हजार ख्रिस्ती आणि दीड हजार मुस्लिम धर्मिय मतदार आहेत. यशाची आपली परंपरा भाजपा कायम राखू शकेल काय या प्रश्नाचे उत्तर येत्या 23 रोजी मतमोजणीवेळी मिळेल.

गोवा मुक्तीपासून कायम पणजीला सक्रिय आमदार लाभले

पोर्तुगीजांच्या राजवटीतून 1961 साली गोवा मुक्त झाला आणि स्वतंत्र गोव्यात 1963 साली विधानसभेची पहिली निवडणूक झाली. त्यावेळपासून आजपर्यंतच्या कालावधीत पणजी मतदारसंघातून जे आमदार निवडून आले, ते सगळे विधानसभेत कायम सक्रिय राहिल्याचे दिसून येते. अभ्यासू, सुशिक्षित आणि राजकीय व सामाजिक क्षेत्रतही सक्रिय राहिलेलेच नेते पणजीतून बहुतांशवेळा निवडून येऊन विधानसभेत पोहचले.

स्वर्गीय मनोहर पर्रीकर यांच्या नावावर तर मोठा विक्रम आहे. 1994 सालापासून ते सलगपणो पणजी मतदारसंघातून निवडून आले व विधानसभा त्यांनी गाजवली. ते एकमेव पणजीचे आमदार असे ठरले, जे मुख्यमंत्री बनले. अन्यथा पणजीहून निवडून आलेला कुणीच आमदार त्यांच्यापूर्वी कधी राज्याचा मुख्यमंत्री बनला नाही. पर्रीकर पुढे देशाचे संरक्षण मंत्रीही बनले. पणजी हा सुशिक्षितांचा मतदारसंघ म्हणून गोव्यात ओळखला जातो. स्वत: पर्रीकर हे आयआयटी पदवीधर होते. पोर्तुगीजांच्या काळात पणजीपासून सात किलोमीटर अंतरावर असलेला जुनेगोवे हा भाग गोव्याची राजधानी होता. जुनेगोवेमध्ये प्लेगची साथ आल्यानंतर सतराव्या शतकात पोर्तुगीजांनी पणजीमध्ये आपले मुख्यालय हलविले. त्यावेळपासून पणजी ही गोव्याची राजधानी बनली. पणजीला पूर्वी नोवा गोवा या नावानेही ओळखले जात होते.