आमदार दिगंबर कामत यांचा पराभव करणारच; विरियातो फर्नांडिस 

मडगाव येथे बैठक

लोकमत न्यूज नेटवर्क, मडगाव :काँग्रेस पक्षासाठी मडगाव मतदारसंघ प्रतिष्ठेचा विषय बनला आहे. त्यामुळेच आपण मडगावातून काँग्रेस कार्यकर्त्यांची पहिली बैठक घेऊन गाठीभेटी सुरू करण्याचा निर्णय घेतला असल्याचे नवनिर्वाचित खासदार विरियातो फर्नांडिस यांनी सांगितले.

२०२७ च्या विधानसभा निवडणुकीत मडगावचे आमदार दिगंबर कामत यांचा पराभव करण्यासाठी आम्ही पूर्णपणे ताकद लावणार, तसेच जनतेने यासाठी एकजूट दाखवावी, असे आवाहन त्यांनी केले. यावेळी सावियो कुतिन्हो यांच्या नेतृत्वाखाली सुमारे ५० हून अधिक कार्यकर्ते उपस्थित होते. मडगावचे आमदार कामत हे भाजपाला मोठी आघाडी मिळणार, असा दावा करीत होते; परंतु त्यांचा दावा फोल ठरला. उलट काँग्रेस पक्षाला मोठी आघाडी मिळाली. लवकरच मडगावातील सर्व गट बांधणी करण्यात येणार आहे. त्यामुळे येत्या विधानसभा निवडणुकीत मडगावातील विद्यमान आमदाराचा पराभव करणे सोपे जाईल, असे फर्नांडिस म्हणाले.

खासदार फर्नांडिस यांनी मडगावातील कार्यकर्त्यांना पहिल्यांदा भेटण्याचा निर्णय घेतल्याबद्दल त्यांचे सावियो कुतिन्हो यांनी अभिनंदन केले. खासदार निधीतील मोठा वाटा मडगावसाठी राखून ठेवावा, असे आवाहन कुतिन्हो यांनी केले. मडगावातील जागा काँग्रेसची आहे. येथीस लोक काँग्रेस उमेदवारासोबतच आहेत, असे ते म्हणाले.