नरेश रहिलेगोंदिया: पोलीस मुख्यालयात कार्यरत पोलीस कर्मचारी संकेत अनिलकुमार शुक्ला (३४) रा. आरटीओ कार्यालयाच्या मागे पाठक कॉलनी गोंदिया हे मोटरसायकलने पत्नीसाेबत गोंदिया शहरात शनी मंदिरात येत असतांना त्यांना चौघांनी बेदम मारहाण केल्याची घटना १३ मे रोजी सकाळी ११.३० वाजता घडली.
शनिवार असल्यामुळे आणि कामाला सुट्टी असल्यामुळे पोलीस कर्मचारी संकेत अनिलकुमार शुक्ला (३४) हे आपल्या पत्नीला मोटारसायकलवर घेऊन गोंदिया शहरात येत होते. परंतु बजरंग नगरच्या होंडा शोरूम जवळ ते आल्यावर आपण पूजेचे साहित्य घरीच विसरलो हे त्यांच्या लक्षात येताच घरी साहित्य आणण्यासाठी लगेच गाडी वळविली. यावेळी रस्त्याने जाणाऱ्या दुचाकी चालकाने त्यांच्याशी हुज्जत घालत शिविगाळ केली.
कॉल करून आपल्या लोकांना बोलाविले आणि चौघांनी पोलीस कर्मचाऱ्याला काठीने मारून गंभीर जखमी केले. मारहाण करणारे आरोपी आफताब आबीद शेख (२३), आबीद रमजान शेख (४३) दोन्ही रा. कवलेवाडा रोड ऑक्सीजन गोदामासमोर फुलचूरपेठ गोंदिया, मतीन उर्फ सोनू राशीद खान (२३) रा. मसीदजवळ आयटीआय चौक फुलचूर व एक महिला अश्या चौघांनी त्यांना मारहाण केली. गोंदिया शहर पोलिसांनी चारही आरोपींवर भादंविच्या कलम ३२४, ५०४, ३४ अन्वये गुन्हा दाखल केला आहे.