"मोठी डील झालीय"; तिकीट कापल्यानंतर चंद्रिकापुरेंचे थेट पत्र; म्हणाले, "अजित पवारांनी खंजीर खुपसला"

Manohar Chandrikapure : अजित पवार यांनी विश्वासघात केल्याचे म्हणत मनोहर चंद्रिकापुरे यांनी एक पत्र लिहून आपली नाराजी व्यक्त केली

Arjuni Morgaon Assembly Constituency : भाजपमधून राष्ट्रवादीत प्रवेश केलेल्या माजी मंत्री राजकुमार बडोलेंना अर्जुनी-मोरगाव विधानसभा मतदारसंघातून अजित पवार यांनी उमेदवारी दिली आहे. बडोलेंना उमेदवारी देताना अजित पवार यांनी विद्यमान आमदार मनोहर चंद्रिकापुरे यांचे तिकीट कापले आहे. त्यामुळे संतप्त झालेल्या मनोहर चंद्रिकापुरे यांनी थेट अजित पवार आणि प्रफुल्ल पटेल यांच्यावर गंभीर आरोप केले आहेत. अजित पवार यांनी विश्वासघात केल्याचे म्हणत मनोहर चंद्रिकापुरे यांनी एक पत्र लिहून आपली नाराजी व्यक्त केली. यानंतर आता चंद्रिकापुरेंनी काँग्रेस नेते विजय वडेट्टीवार यांची भेट घेतली आहे. त्यामुळे चंद्रिकापुरे हे काँग्रेसमधून निवडणूक लढणार असल्याची चर्चा सुरु झालीय.

भाजपचे नेते आणि राज्याचे माजी सामाजिक न्यायमंत्री राजकुमार बडोले यांनी मंगळवारी अजित पवार यांच्या राष्ट्रवादी काँग्रेस पक्षात प्रवेश केला होता. त्यानंतर दुसऱ्याच दिवशी त्यांना विद्यमान आमदार चंद्रिकापुरे यांच्या जागी उमेदवारी जाहीर करण्यात आली.  दोन पक्षांतील सहमतीने बडोलेंनी अजित पवार गटात प्रवेश करून उमेदवारी पक्की केली. त्यामुळे अजित पवार गटाचे विद्यमान आमदार मनोहर चंद्रिकापुरे यांचा पत्ता कट करण्यात आला. बडोलेंचा मागील निवडणुकीत राष्ट्रवादीचे चंद्रिकापुरे यांनी पराभव केला होता. मात्र, त्यांच्याबाबत मतदारसंघात असलेली नाराजी पाहता अजित पवार यांनी चंद्रिकापुरे यांना उमेदवारीस नकार दिला.

उमेदवारी न मिळाल्यानंतर मनोहर चंद्रिकापुरे यांनी एक पत्र लिहून अजित पवार यांच्यावर विश्वासघाताचा आरोप केला आहे. इच्छा नसतानाही  मी आणि माझा मतदारसंघ तुमच्यासोबत राहिला, पण तुम्ही माझा विश्वासघात केला म्हणत मनोहर चंद्रिकापुरे यांनी आपली नाराजी व्यक्त केली आहे. पाठीत खंजीर खुपसणाऱ्या अजितदादा पवार व प्रफुल्लभाई पटेल यांना थेट पत्र म्हणत मनोहर चंद्रिकापुरेंनी ही पोस्ट फेसबुकवर शेअर केली आहे. दुसरीकडे, मनोहर चंद्रिकापुरे यांनी काँग्रेस नेते विजय वडेट्टीवार यांची भेट घेतली आहे. त्यामुळे ते काँग्रेसमधून उभे राहण्याची शक्यता आहे.

मनोहर चंद्रिकापुरेंचे पत्र 
 
"दादा हा 'विश्वासघात' जनतेला 'पटेल'च असं नाही! नमस्कार, मी राष्ट्रवादी काँग्रेस पार्टीचा निष्ठावंत व एकनिष्ठ कार्यकर्ता बोलतोय. आज माझं तिकीट कापण्यात आल्याचं समजल. मुंबईत येऊनही रिकाम्या हाताने परत यावं लागलं याचं मनापासून दुःख झालंय. दादा, जेव्हा महायुतीत जाण्याचा निर्णय तुम्ही घेतला तेव्हा इच्छा नसतानाही आपल्यावर श्रद्धा आणि विश्वास ठेऊन मी आणि माझा मतदारसंघ तुमच्यासोबत राहिला. आम्ही तुमच्यावर विश्वास ठेवला, पण तुम्ही माझा विश्वासघात केला. केवळ, माझाच नाही तर माझ्यासह माझ्या अर्जुनी मोरगाव मतदारसंघातील लाखो नागरिकांचा हा विश्वासघात आहे. मीच राष्ट्रवादीचा उमेदवार असेन, असं सांगत मी मतदारसंघातील गावं न गावं पिंजून काढली, येथील जनतेला भेटून आपली भूमिका कशी बरोबर आहे, हे समजावलं. पण, ऐनवेळी माझ्याच पाठीत खंजीर खुपसला. दादा, पाठीत खंजीर खुपसल्याचे वाईट वाटते हो, पण ज्या हातात खंजीर आहे, तो हात आपलाच असल्यावर जास्त वाईट वाटते. दोन दिवसांपूर्वी भाजपचा नेता प्रफुल भाई पटेल यांना भेटला आणि त्यांना पटलं. हे सहजच पटेल असं नक्कीच वाटत नाही, यात मोठी डील झालीय अशीच चर्चा आता मतदारसंघात, जनतेत सुरू आहे. कालपर्यंत मी भाजपचा निष्ठावंत, कट्टर म्हणणार नेता आज सुमडीत आपल्या पक्षात आला, दादा, नेतेमंडळी पक्ष बदलायला मोकळी असते, पण सतरंज्या उचलणारा कार्यकर्ता एकनिष्ठतेची अग्निपरीक्षा देत असतो. म्हणूनच, आमच्या इथल्या नेत्याची सख्यासारखी बदललेली भूमिका पाहून वाईट वाटलं. मला आणि माझ्या मतदारसंघातील जनतेलासुद्धा. उद्याच आजसुद्धा मला माहिती नाही, पण मतदारसंघातील जनता हे विसरणार नाही, हा विश्वासघातकीपणा लक्षात ठेवेल, तुम्हाला कदाचित हे पटलं असेल, पण माझ्या लोकांना हे अजिबात 'पटेल' असं नाही. त्यामुळेच याच निवडणुकीत याचा हिशोब होणार आणि जनताच सुफडासाफ करणार. कारण, आता मी जनतेमध्ये जाऊनच दाद मागणार आहे, आता जनतेलाच विधानसभेचं तिकीट मागणार आहे," असे मनोहर चंद्रिकापुरे यांनी आपल्या पत्रात म्हटलं आहे.