- मयूर पठाडेझोपेच्या बाबतीत आपण अनेक मोठमोठ्या व्यक्तींची उदाहरणं देतो. ही लोकं किती कमी झोपत होती, म्हणूनच त्यांच्याकडून इतकी मोठी कामं होऊ शकली, तुम्हाला आयुष्यात काही करायचं असेल तर वेळेचा जास्तीत जास्त सदुपयोग करताना झोपेचा ‘फालतू’ वेळ कमी करा, असाही सल्ला आपल्याला बऱ्याचदा मिळतो, पण हे अर्धसत्य आहे..तुम्हाला कमी झोप मिळाली किंवा तुम्हाला निद्रानाशाच विकार असेल, तर सावधान, तुम्हाला भविष्यात अल्झायमरचा धोका होऊ शकतो किंवा मेंदूसंबंधातील विकारांना तरी तुम्हाला सामोरं जावं लागू शकतं.
इटलीच्या मार्क पॉलिटेक्निक युनिव्हर्सिटीच्या संशोधकांनी नुकताच एक अभ्यास केला. झोपेचा आपल्या आयुष्यावर, आरोग्यावर काय परिणाम होतो, या संदर्भातला हा अभ्यास होता. अर्थातच हा प्रयोग त्यांनी उंदरांवर केला.संशोधकांनी उंदरांचे दोन गट केले. पहिल्या गटातील उंदरांना त्यांनी मनसोक्त, पाहिजे तितक्या वेळ झोपू दिलं. दुसऱ्या शब्दांत सांगायचं तर हे उंदिर दिवसाल्या आठ तासापेक्षा जास्त वेळ जागे नव्हते! म्हणजे किती वेळ ते झोपले होते, याचा हिशेब तुम्हीच करा. (आणि इतक्या वेळ जर आपण झोपलो, तर आपल्या घरचे आपलं काय करतील, याचाही विचार करून ठेवा..)दुसऱ्या गटातील उंदरांना संशोधकांनी तब्बल पाच दिवसांपर्यंत झोपूच दिलं नाही. त्यांना जास्तीत जास्त वेळ जागं ठेवण्याचा प्रयत्न केला.
संशोधनाचा निष्कर्ष तसा अफलातून होता. तुम्ही जर कमी झोप घेत असाल, तर थोड्या कालाीवधीसाठी कदाचित ही गोष्ट तुमच्या फायद्याची ठरू शकते, पण रोज तर तुम्ही कमी झोप घेत असाल, झोपच येत नसेल, निद्रानाश जडला असेल, किंवा तुमच्यावरच्या जबाबदाऱ्यांमुळे तुम्हाला पुरेशी झोप घेता येत नसेल.. तर मात्र तुमच्या आयुष्याला धोका आहे.या कमी झोपेमुळे अल्झायमरचा धोका तुमच्यासाठी खूप मोठा आहे. याशिवाय मेंदूचे इतर विकारही कमी झोपेमुळे जडू शकतात.त्यामुळेच संशोधकांचा सल्ला आहे, जागरणं टाळा, झोपेकडे अजिबात दुर्लक्ष करू नका. तसं केलंत तर तुम्ही हळूहळू स्वत:लादेखील परके होत जाल..