हिंगोली : सेनगाव तालुक्यातील कवठा येथे ट्रॅक्टरच्या पंजीवर थुंकण्याच्या कारणावरून झालेल्या वादातून दोन गटांत तुंबळ हाणामारी झाल्याची घटना २० एप्रिल रोजी सकाळी ६:३० च्या सुमारास घडली.
यात पहिल्या गटाच्या तक्रारीनुसार कवठा येथे २० एप्रिल रोजी सकाळी ६:३० च्या सुमारास फिर्यादी रामदास प्रल्हाद बांगर यांचा पुतण्या परमेश्वर रमेश बांगर हा घरासमोर ब्रश करीत होता. तो थुंकल्याने पाणी बालाजी भगवान बांगर याच्या ट्रॅक्टरवर पडले. त्यामुळे बालाजीने लोखंडी रॉडने डोक्यात, हातावर, पाठीत मारून जखमी केले. तर भगवान आत्माराम बांगर, कृष्णा भगवाना बांगर, आकाश भगवान बांगर या तिघांनीही लाथाबुक्क्यांनी मारहाण केल्याचे सेनगाव पोलिस ठाण्यात दिलेल्या तक्रारीत म्हटले.
तर दुसऱ्या गटाचे बालाजी भगवान बांगर यांनी दिलेल्या तक्रारीत म्हटले की, ज्ञानेश्वर रमेश बांगर हा ब्रश करीत असताना ट्रॅक्टरच्या पंजीवर थुंकला. तेव्हा त्यास थुंकू नको म्हणताच त्याने शिवीगाळ केली. तर किशोर रमेश बांगर याने दगड हातात घेवून कानाजवळ, पाठीत मारून जखमी केले. तर परमेश्वर रमेश बांगर, रामदास प्रल्हाद बांगर या दोघांनीही लाथाबुक्क्यांनी मारहाण केली. बालाजीसह त्याच्या वडिलास व भावासह दगडाने पाठीत, डोक्यात मारहाण करून जखमी केले. जिवे मारण्याची धमकी दिल्याचे तक्रारीत म्हटले.