हिंगोली : शहराजवळील खटकाळी भागातील एका विहिरीमध्ये १५ फेब्रुवारी रोजी सकाळी सात वाजण्याच्या सुमारास एका २५ वर्षीय महिलेचा मृतदेह आढळून आला. या मृत महिलेच्या हातावर कापल्याच्या जखमा असल्याचे सांगितले जात आहे. पोलिसांनी तपास सुरु केला असून, तपासानंतरच ही आत्महत्या आहे की खून हे स्पष्ट होणार आहे.
खटकाळी भागातील विहिरीवर सोमवारी सकाळी चिखलवाडी भागातील काही नागरिक पाणी भरण्यासाठी गेले होते. त्यावेळी त्यांना पाण्यावर महिलेचा मृतदेह तरंगत असल्याचे दिसले. या घटनेची माहिती हिंगोली ग्रामीण पोलिसांना मिळताच पोलीस अधीक्षक राकेश कलासागर यांच्या मार्गदर्शनाखाली अतिरिक्त पोलीस अधीक्षक यतीश देशमुख, हिंगोली ग्रामीण पोलीस ठाण्याचे सहाय्यक पोलीस निरीक्षक बळीराम बंदखडके, जमादार रविकांत हरकाळ, अशोक धामणे, गजानन पोकळे यांच्या पथकाने घटनास्थळी भेट दिली. त्यानंतर नागरिकांच्या मदतीने पोलिसांनी मृतदेह विहिरीबाहेर काढला. दरम्यान, मृत महिला ही महसूल कॉलनी भागात राहणारी असून, तिचे नाव ऐश्‍वर्या महेश श्रीरामे असल्याचे पोलिसांनी सांगितले. ज्या विहिरीत मृतदेह आढळला, त्या विहिरीवर रक्ताचे डाग असून, विहिरीपासून काही अंतरावरही रक्त सांडलेले आहे. त्यामुळे या महिलेने आत्महत्या केली की तिचा खून झाला, यादृष्टीने पोलिसांनी तपास सुरु केला आहे. याप्रकरणी हिंगोली ग्रामीण पोलीस ठाण्यात नोंद झाली नव्हती.