Hockey World Cup, India vs Spain : १९७५ नंतर पुन्हा वर्ल्ड कप जिंकण्याच्या निर्धाराने मैदानावर उतरलेल्या भारतीय पुरुष हॉकी संघाने पहिल्याच सामन्यात स्पेनवर २-० असा विजय मिळवला. १९७५ मध्ये अजितपाल सिंग यांच्या नेतृत्वाखाली भारताने एकमेव वर्ल्ड कप जिंकला होता. १९७१ मध्ये झालेल्या पहिल्या वर्ल्ड कप स्पर्धेत कांस्य आणि १९७३ मध्ये रौप्यपदक जिंकले होते. भुवनेश्वर येथे सुरू झालेल्या या वर्ल्ड कप स्पर्धेचा हा सामना पाहण्यासाठी प्रेक्षकांनी स्टेडियम खचाखच भरले होते आणि भारतीय संघासाठी त्यांनी तेराव्या खेळाडूची भूमिका सक्षमपणे पार पाडली.
स्पेन आणि भारत यांच्यात वर्ल्ड कपमध्ये आतापर्यंत ६ सामने झाले होते अन् स्पेनचे पारडे ३-२ असे वरचढ होते. एक सामना ड्रॉ राहिलेला. पण, एकंदर जय-पराजयाच्या आकडेवारीत भारत १३-११ असा आघाडीवर आहे. १२व्या मिनिटाला रोहिदास अमितने गोल करताना भारताला १-० अशी आघाडी मिळवून दिली. पहिल्या कॉर्टरमधील भारताचा हा दुसरा कॉर्नर होता अन् तोही हुकला होता. पण, रिबाऊंडवर अमितने सुरेख संधी साधली. रोहिदास अमितने केलेला हा गोल भारताचा वर्ल्ड कप स्पर्धेतील २०० वा गोल ठरला. पहिल्या क्वार्टरमध्ये भारताने १-० अशी आघाडी कायम राखली. हॉकी वर्ल्ड कपमध्ये सर्वाधिक गोल करणाऱ्या संघात ( ३१३) ऑस्ट्रेलिया आघाडीवर आहे. त्यानंतर २६७ - नेदरलँड्स, २३५ - पाकिस्तान, २००* - भारत, १८० - इंग्लंड, १७६ - स्पेन व १५४ - अर्जेंटिना असा क्रमांक येतो.
अखेरच्या १५ मिनिटांत आता भारताला २-० अशी आघाडी कायम राखून विजय निश्चित करण्यासाठी बचाव अधिक भक्कम करायचा होता आणि त्यात भारतीय खेळाडूंनी कोणतीच उणीव ठेवली नाही. गोलरक्षक कृष्णाने आणखी एक जबरदस्त बचाव केला. सामना संपायला ७ मिनिटं असताना हा गोल रोखला गेल्याने स्पेनचे खेळाडू पूर्णपणे हताश झालेले दिसले. त्यात त्यांच्याकडून पेनल्टी कॉर्नरची संधीवर चूका झाल्या. भारताच्या अभिषेकला पिवळं कार्ड मिळाल्याने १० मिनिटं मैदानाबाहेर बसावे लागले, तरीही एक खेळाडू कमी असूनही भारताच्या बचावात काहीच उणीव जाणवली नाही. भारताने २-० अशी ही मॅच जिंकली. ८ ऑलिम्पिक सुवर्णपदकं नावावर असलेल्या भारतीय हॉकी संघाने केवळ एकदाच वर्ल्ड कप जिंकला आहे.