नवी दिल्ली - रशिया आणि युक्रेनमधील वाद आता आणखी चिघळला आहे. रशियाकडून युक्रेनवर वारंवार हल्ले केले जात आहेत. याच दरम्यान युक्रेनच्या मिलिट्री ट्रेनिंग ग्राऊंडवर रशियाने 'एअर स्ट्राईक' केला आहे. यामध्ये तब्बल 35 जणांचा मृत्यू झाला असून 134 जण जखमी झाले आहेत. रिपोर्टनुसार, रशियाने युक्रेनच्या लवीव या युक्रेन-पोलंड सीमेजवळील लष्करी तळावर हवाई हल्ला केला आहे. या हल्ल्यात एकूण 35 जणांचा मृत्यू झाला असून शेकडो जण जखमी झाले आहेत. यातील अनेक जणांची प्रकृती गंभीर असल्यामुळे मृतांचा आकडा वाढण्याची शक्यता आहे.
अधिकाऱ्यांनी दिलेल्या माहितीनुसार, पोलंडच्या सीमेजवळ हा हल्ला झाला आहे. या हल्ल्यात ज्या ठिकाणी हल्ला झाला, तेथील प्रांतीय गव्हर्नर मॅक्सिम कोझित्स्की यांनी हल्ल्याची पुष्टी केली आहे. युक्रेनच्या संरक्षणमंत्र्यांनीही या हल्ल्याचा निषेध केला असून त्यांनी याबाबत माहिती दिली आहे. यापूर्वी, युक्रेनच्या संरक्षण मंत्रालयाने निर्वासितांच्या ताफ्यावर रशियन गोळीबारात एका मुलासह सात युक्रेनियन ठार झाल्याची माहिती दिली होती. हल्ल्यानंतर या ताफ्याला परत जावे लागले.
रशियाने युक्रेनियन शहरांवर जोरदार बॉम्बफेक करायला सुरुवात केली आहे आणि राजधानी कीव्हच्या बाहेरील भागात गोळीबार तीव्र केला आहे. रशियन आक्रमणाचा सर्वाधिक फटका मारियुपोलला बसला आहे. सततच्या गोळीबारामुळे 430,000 लोकसंख्येच्या शहरात अन्न, पाणी आणि औषध आणण्याचे आणि अडकलेल्या नागरिकांना वाचवण्याचे प्रयत्न अयशस्वी झाले आहेत. कार्यालयाच्या म्हणण्यानुसार मारियुपोलमध्ये 1,500 हून अधिक लोक मारले गेले आहेत आणि गोळीबारामुळे सामूहिक कबरींमध्ये मृतदेह दफन करण्याच्या प्रयत्नांनाही अडथळा येत आहे. एका हिंदी वेबसाईटने याबाबतचे वृत्त दिले आहे.
हृदयद्रावक! आजारी आईला रुग्णालयात घेऊन जाणाऱ्या महिलेवर रशियन सैनिकांनी झाडल्या गोळ्या
आईच्या औषधासाठी घराबाहेर पडलेल्या महिलेवर रशियन सैनिकांनी गोळ्या झाडल्याची भयंकर घटना घडली आहे. या हल्ल्यामध्ये महिलेसह तिच्या आईचाही दुर्दैवी मृत्यू झाला आहे. द मिररच्या रिपोर्टनुसार, वेलेरिया मक्सेत्स्का असं या महिलेचं नाव असून त्या आपल्या आईसोबत कीव्ह येथील रस्त्यावर थांबली होती. त्याचवेळी रशियन सैनिकांनी केलेल्या गोळीबारात त्यांचा मृत्यू झाला. वेलेरियाची आई खूप आजारी होती. त्यामुळे त्यांनी रुग्णालयात घेऊन जाऊन औषधं आणण्यासाठी त्या घराबाहेर पडल्या होत्या पण त्याच दरम्यान रशियन सैनिकांनी त्यांना गोळ्या घालून ठार केलं. या घटनेने सर्वांनाच मोठा धक्का बसला आहे.