बंधाऱ्यात आढळला एकाचा मृतदेह

जाफराबाद तालुक्यातील दहिगाव येथील एका व्यक्तीचा कोल्हापुरी बंधा-यात बुडून मृत्यू झाला.

लोकमत न्यूज नेटवर्कटेंभुर्णी : जाफराबाद तालुक्यातील दहिगाव येथील एका व्यक्तीचा कोल्हापुरी बंधा-यात बुडून मृत्यू झाला. ही घटना रविवारी पहाटे समोर आली.पुरूषोत्तम अशोक देशमुख (४२ रा. दहिगाव) असे मयताचे नाव आहे. दहिगाव येथील पुरूषोत्तम देशमुख हे मागील दोन दिवसांपासून बेपत्ता होते. नातेवाईकांनी त्यांचा सर्वत्र शोध घेतला. मात्र त्यांचा कुठलाच सुगावा लागला नाही. रविवारी पहाटेच्या सुमारास दहिगाव जवळील पूर्णा नदीवर बांधलेल्या कोल्हापुरी बंधा-यात त्यांचा मृतदेह आढळून आला. पोलिसांनी घटनास्थळी धाव घेऊन पंचनामा केला. या प्रकरणी टेंभुर्णी पोलीस ठाण्यात अकस्मात मृत्यूची नोंद करण्यात आली आहे. मयतावर रविवारी दुपारी दहिगाव येथे अंत्यसंस्कार करण्यात आले. त्यांच्या पश्चात आई, वडील, पत्नी, दोन मुले असा परिवार आहे.अल्पभूधारक शेतकरी असलेला पुरूषोत्तम हे आपल्या परिवारातील कर्ता पुरुष होते. त्यांच्या निधनाने देशमुख कुटुंबावर मोठे संकट कोसळले आहे.