शंभर पोलीस कर्मचाऱ्यांना मिळणार निवासी प्रशिक्षण

पोलीस नाईक, पोलीस हेडकॉन्स्टेबल म्हणून बढतीस पात्र असलेल्या जिल्हा पोलीस दलातील १०० पोलीस कर्मचाऱ्यांना मुख्यालयात निवासी प्रशिक्षण देण्यात येणार आहे.

विजय मुंडे ।लोकमत न्यूज नेटवर्कजालना : पोलीस नाईक, पोलीस हेडकॉन्स्टेबल म्हणून बढतीस पात्र असलेल्या जिल्हा पोलीस दलातील १०० पोलीस कर्मचाऱ्यांना मुख्यालयात निवासी प्रशिक्षण देण्यात येणार आहे. वरिष्ठ स्तरावरून संबंधित कर्मचा-यांची यादी तयार करण्यात आली आहे.पोलीस दलातील अधिकारी, कर्मचा-यांची तोकडी संख्या आणि इतर अतिरिक्त कामामुळे गुन्ह्यांच्या तपासावर मोठा परिणाम होताना दिसत आहे. दाखल होणा-या गुन्ह्याचा तपासाधिका-याला चांगल्या पध्दतीने उलगडा करता यावा, यासाठी पोलीस दलाच्या वतीने नियमित सेवांतर्गत प्रशिक्षण दिले जाते. पोलीस दलाने यापुढेही एक पाऊल टाकत बढतीसाठी पात्र असलेल्या कर्मचा-यांनाही प्रशिक्षण देण्याचा निर्णय घेतला आहे. पोलीस महानिरीक्षकांच्या सूचनेनुसार पोलीस अधीक्षक एस. चैतन्य यांच्या मार्गदर्शनाखाली जिल्हा पोलीस दलातील पोलीस नाईक व पोलीस हेडकॉन्स्टेबल म्हणून बढतीसाठी पात्र असलेल्या कर्मचा-यांना प्रशिक्षण देण्यात येणार आहे.प्रशिक्षणासाठी जिल्ह्यातील १०० पोलीस कर्मचा-यांची यादी तयार करण्यात आली आहे. पोलीस मुख्यालयात निवासस्थानासह भोजनाची व्यवस्था केली जाणार असून, पहाटेपासून रात्रीपर्यंत गुन्ह्याचा तपास, तणावमुक्त कामकाज, आधुनिक शस्त्रास्त्रे, कायद्यातील बदल, न्यायालयाचे निर्णय, शरीर स्वास्थ्यासाठी योगा व यासह इतर बाबींवर प्रशिक्षण दिले जाणार आहे.अधिका-यांना नियमित प्रशिक्षणजिल्हा पोलीस दलात कार्यरत असलेल्या अधिका-यांनाही नियमित प्रशिक्षण दिले जाते. यासाठी औरंगाबाद येथे अधिका-यांच्या तुकड्या पाठविल्या जात असून, कायद्यातील बदल, आधुनिक शस्त्रांसह इतर बाबींचे प्रशिक्षण अधिका-यांना दिले जात आहे.