भोकरदन : धारदार शस्त्राचा धाक दाखवून चार दरोडेखोरांनी रोख रकमेसह सोन्याचे दागिने लंपास केल्याची घटना भोकरदन तालुक्यातील सिरसगाव येथील राजू सहाणे यांच्या शेतात शुक्रवारी मध्यरात्री घडली. दरोडेखोरांनी रोख रकमेसह सोन्याचे दागिने असा लाखो रुपयांचा मुद्देमाल लंपास केला.
भोकरदन तालुक्यातील सिरसगाव मंडप येथील राजू सहाणे हे आपल्या कुटुंबीयांसह शेतातील घरात झोपले होते. शुक्रवारी रात्री दीड वाजण्याच्या सुमारास चार दरोडेखोरांनी घराचा दरवाजा वाजवला असता, राजू सहाणे यांनी दरवाजा उघडला. दरवाजा उघडताच दरोडेखोरांनी लोखंडी गज, काठ्या तसेच विळ्याचा धाक दाखवून घरात प्रवेश केला. दरोडेखोरांनी घरातील कपाट व डब्यांमध्ये ठेवलेली रोख रक्कम ७५ हजार रुपये, २४ हजारांचे मणीमंगळसूत्र, गहू मण्यांची चार ग्रॅमची सोन्याची पोत, एक ग्रॅमची कानातील फुले, सहाणे यांच्या आईचे मणीमंगळसूत्र, चार ग्रामच्या बाल्या असा लाखो रुपयांचा मुद्देमाल लंपास केला. या प्रकरणी राजू सहाणे यांच्या फिर्यादीवरून भोकरदन पोलीस ठाण्यात गुन्हा दाखल करण्यात आला. घटनेची माहिती मिळताच उपविभागीय पोलीस अधिकारी इंदलसिंग बहुरे, पोलीस निरीक्षक चत्रभूज काकडे यांनी घटनास्थळाची पाहणी केली. पुढील तपास पोलीस उपनिरीक्षक भागवत नागरगोजे हे करीत आहेत.