लोकमत न्यूज नेटवर्क
जळगाव : अमळनेर-जळगाव बसमधून प्रवास करत असताना पल्लवी सुनील चौधरी (रा. महाबळ) यांच्या बॅगेतून १० हजार रुपयांची रोकड चोरल्याची घटना शनिवारी दुपारी घडली. याप्रकरणी जिल्हापेठ पोलीस ठाण्यात अज्ञात चोरट्याविरुद्ध गुन्हा दाखल करण्‍यात आला आहे.
महाबळ येथील पल्लवी चौधरी या अमळनेर येथे गेल्या होत्या. जळगावात परतण्यासाठी शनिवारी दुपारी १२.३० वाजता त्या अमळनेर-जळगाव एसटी बसमध्‍ये बसल्या. दुपारी २ वाजेच्या सुमारास जळगावातील आकाशवाणी चौकात उतरल्या. त्यांनी त्यांची बॅग तपासली असता, त्यात ठेवलेले १० हजार रुपये चोरीला गेल्याचे दिसून आले.
बसमधील महिलेवर संशय
अमळनेर-जळगाव बसमधून खाली उतरत असताना चौधरी यांना मागे उभ्या असलेल्या महिलेने धक्का दिला होता. त्यावेळी त्या महिलेने बॅगेची चेन उघडून रोकड लांबविली, असा संशय चौधरी यांना आहे. हा प्रकार घडल्यानंतर त्यांनी जिल्हापेठ पोलीस ठाण्यात तक्रार दिली. पाठीमागे उभ्या असलेल्या महिलेचे वर्णनसुद्धा पोलिसांना सांगितले. दरम्यान, शनिवारी सायंकाळी या प्रकरणी जिल्हापेठ पोलीस ठाण्यात गुन्हा दाखल करण्‍यात आला आहे. पुढील तपास चंद्रकांत पाटील करीत आहेत.