स्वच्छतागृहाच्या कामाचे भूमिपूजन

लोकमत न्यूज नेटवर्क

जळगाव : महापालिकेने लोकसहभागातून शहरातील विविध भागात स्वच्छतागृह तयार करण्यासाठी तयारी सुरू केली आहे. त्यानुसार मंगळवारी शहरातील नवीन बसस्थानकासमोरील जागेवर सुप्रीम इंडस्ट्रीजच्या माध्यमातून तयार होणाऱ्या स्वच्छतागृहाच्या कामाचे भूमिपूजन महापौर जयश्री महाजन यांच्या हस्ते करण्यात आले.

यावेळी मनपा आयुक्त सतीश कुलकर्णी, माजी महापौर नितीन लढ्ढा, शिवसेनेचे महानगराध्यक्ष शरद तायडे, माजी स्थायी समिती सभापती अ‍ॅड. शुचिता हाडा, नगसेवक अनंत जोशी, नगरसेवक सचिन पाटील, सुप्रिमचे सिनिअर जनरल मॅनेजर प्रभुदेसाई आदी उपस्थित होते.

शहराच्या मध्यवर्ती भागात असलेल्या नवीन स्थानकासमोर सुप्रीम इंडस्ट्रीज कंपनीने सीएसआर निधीतून स्वच्छतागृह उभारण्याची तयारी दर्शविली होती, अखेर या कामाला सुरुवात झाली आहे. या स्वच्छतागृहाच्या बाजूलाच असणाऱ्या रिक्षा स्टॉपवरील रिक्षा चालकांनीही या कामास प्रारंभ होत असल्याबद्दल समाधान व्यक्त केले आहे.