जळगाव : समोरील वाहनाला ओव्हरटेक करताना नियंत्रण सुटल्याने ट्रकने तीन उलट्या घेत शंभर फूट खोल दरीत कोसळला. रविवारी सकाळी साडेआठ वाजता राष्ट्रीय महामार्गावर बांभोरी जकातनाक्याजवळ हा अपघात घडला. दैव बलवत्तर म्हणून चालकाला जराही खरचटले नाही. राजू माळी (रा.पाळधी, ता.धरणगाव) असे या चालकाचे नाव आहे.
या घटनेबाबत घटनास्थळावरील लोकांकडून मिळालेल्या माहितीनुसार, बांभोरी येथील सोपान कोळी यांच्या मालकीच्या ट्रकवर (क्र.एमएच ०४ सीयू २२८८ ) राजू माळी हा तरुण चालक आहे. रविवारी सकाळी ८.३० वाजता ट्रक जळगावहून पाळधीकडे जात होता. यादरम्यान बांभोरी जकात नाक्यापासून काही अंतरावर समोरून येणार्‍या वाहनाला वाचविण्याच्या प्रयत्नात तसेच ब्रेक न लागल्याने चालक राजू माळी याचे ट्रकवरील नियंत्रण सुटले. त्यात ट्रक थेट शंभर फूट खोल असलेल्या दरीत कोसळला. यावेळी पाच ते सहा झाडे तुटली. इतकी भयंकर घटना घडल्यानंतरही माळी यांना अगदी किरकोळ दुखापत झाली. ट्रकचे मात्र मोठे नुकसान झाले आहे.
पाच तासांनंतर बाहेर काढला ट्रक
तीन ते चार वेळा पलटी घेतल्यानंतर ट्रक थेट दरीत कोसळला. तेथे एका ठिकाणी झाडाला अडकला. घटनेची माहिती मिळाल्यावर तालुका पोलीस स्टेशनचे ज्ञानेश्वर कोळी यांच्यासह बांभोरी येथील तरुण तसेच नागरिकांनी धाव घेतली. वाहनधारक तसेच बांभोरी येथील तरुण यांच्या मदतीने अडकलेला ट्रक खाली नेण्यात आला. तत्पूर्वी चालक राजू माळी यास ट्रकमधून बाहेर काढण्यात आले. यानंतर ट्रॅक्टरच्या साहाय्याने तसेच बांभोरी तरुण, वाहनधारक यांच्या अथक परिश्रमाने तब्बल पाच तासांनंतर दुपारी दीड वाजेच्या सुमारास ट्रक बाहेर काढण्यात यश आले.