लोकमत न्यूज नेटवर्क
जळगाव : काहीही कारण नसताना अचानक घरात येवून दीपक दगडू भोई यांच्यासह त्यांच्या भावाला व वहिणीला चौघांनी बॅट व लोखंडी रॉडने बेदम मारहाण केली. ही घटना १७ रोजी रात्री १०.३० वाजेच्या सुमारास इंद्रप्रस्थनगरातील शिवशंकर कॉलनीत घडली. दरम्यान, दीपक यांच्या डोक्यात बॅट मारल्यानंतर चॉपरने सुध्दा हल्ला करण्यात आला. यात ते गंभीर जखमी झाले आहेत. याप्रकरणी चार जणांविरूध्द शहर पोलीस ठाण्‍यात गुन्हा दाखल करण्यात आला आहे.
दीपक भोई हे शिवशंकर कॉलनीत भाऊ युवराज व भावाची पत्नी कविता यांच्यासह वास्तव्यास आहेत. १७ रोजी रात्री १०.३० वाजेच्या सुमारास दीपक हे दुचाकीने किरकोळ साहित्य घेण्यासाठी किराणा दुकानावर गेले होते. घरी येत असताना, काहीही कारण नसताना हितेन सोनवणे (रा.शिवशंकर कॉलनी) याने त्यांना बॅट मारून फेकली. मात्र, दीपक हे तेथे न थांबता घरी निघून गेले. काही वेळानंतर हितेन व रवींद्र सोनवणे, सोनवणे यांचा जावई (नाव माहित नाही) तसेच पूजा सोनवणे व पुषा सोनवणे हे दीपकच्या घरी आले व त्यास शिवीगाळ करण्यास सुरूवात केली. रवींद्र याने त्याच्या हातातील रॉड हा दीपक यांच्या डोक्यात मारला. त्यात ते रक्तबंबाळ झाले. नंतर एकाने त्याच्यावर चॉपरने वार केला. भाऊ युवराज हा भांडण सोडविण्यासाठी आला असता, त्याला देखील रवींद्र याने लोखंडी रॉड मारून जखमी केले. तसेच हितेन याने दीपक यांच्या वहिनी कविता यांना सुध्दा बॅटने हातावर मारहाण केली. या हल्ल्यात दीपक, त्यांचा भाऊ व वहिनी गंभीर जखमी झाले.
तिघांवर उपचार सुरू...
दरम्यान, भोई कुटूंबाला मारहाण होत असल्याचे पाहून रहिवाश्यांनी मध्यस्थी करीत भांडण सोडविले व नंतर जखमी तिघांना रूग्णालयात उपचारार्थ दाखल केले. शुक्रवारी शहर पोलिसांनी जखमी दीपक यांचे जबाब नोंदविल्यानंतर रात्री हितेन सोनवणे, रवींद्र सोनवणे व त्यांचा जावई तसेच पुजा सोनवणे (सर्व रा.शिवशंकर कॉलनी) यांच्याविरूध्द गुन्हा दाखल करण्यात आला आहे.