जळगाव : गोदावरी इन्स्टिट्यूट ऑफ मॅनेजमेंट अ‍ॅण्ड रिसर्चमध्ये शैक्षणिक वर्ष २०२०-२१ करिता एमबीए अभ्यासक्रमाची ऑनलाईन प्रवेशप्रक्रिया ८ ते २८ डिसेंबर या कालावधीत राबविण्यात येत असून, त्याबाबतचे वेळापत्रक तंत्रशिक्षण संचालनालयाकडून जाहीर केले आहे. कोविडच्या पार्श्वभूमीवर पूर्वी ज्या पद्धतीने महाविद्यालयात कागदपत्रे पडताळणीसाठी सुविधा केंद्र सुरू असायचे, तशी पद्धत यावर्षी न राबविता स्टेट कॉमन एन्ट्रन्स टेस्ट सेल महाराष्ट्र राज्य यांच्या वतीने ई-स्कुटिनी सेंटर सुरू करण्यात आले आहे.
गोदावरी इन्स्टिट्यूट ऑफ मॅनेजमेंट अ‍ॅण्ड रिसर्चने हे सेंटर सुरू केले आहे. त्याचा क्रमांक ५१०२ असून त्यावर विद्यार्थी आपले ऑनलाईन कागदपत्रे अपलोड करू शकतील व त्याची ऑनलाईन नोंदणी व कागदपत्र पडताळणीही महाविद्यालयाच्या ईस्कुटिनी सेंटरद्वारे होणार आहे. या सेंटरमध्ये नोंदणी करणे अत्यावश्यक आहे. नोंदणी न केलेल्या विद्यार्थ्यांची नावे अंतिम मेरिट लिस्टमध्ये येणार नाही व शिष्यवृत्तीसही अपात्र ठरू शकतील.
असे आहे वेळपत्रक: ८ ते १३ डिसेंबरदरम्यान ऑनलाईन अर्ज प्रक्रिया राबविली जाणार असून १४ डिसेंबर रोजी सायंकाळी ५ वाजेपर्यंत पडताळणी केली जाणार आहे. १६ डिसेंबर रोजी तात्पुरती गुणवत्ता यादी जाहीर करण्यात येणार आहे. १७ व १८ डिसेंबर रोजी सूचना, बदल अथवा तक्रार नोंदविता येणार असून, २० डिसेंबर रोजी अंतिम मेरिट लिस्ट जाहीर करण्यात येणार आहे. पहिला कॅप राऊंड २१ ते २३ डिसेंबर व दुसरा कॅप राऊंड ३१ डिसेंबर २०२० ते १ जानेवारी २०२१ दरम्यान होणार आहे. विद्यार्थ्यांनी अधिक माहितीसाठी व प्रवेशासंबंधीच्या विविध अडचणींसाठी प्रा. चंद्रकांत डोंगरे (७५०७७०००७५) आणि प्रा. चेतन सरोदे (९८६०६००१६५) या क्रमांकावर संपर्क साधावा, असे आवाहन महाविद्यालय प्रशासनाने केले आहे.