पोलीस सूत्रांनी दिलेल्या माहितीनुसार, सतीश पाटील हा तरुण नरेंद्र मानसिंग पाटील यांच्या मालकीच्या एमआयडीसीतील एस. ५३ सेक्टरमधील शुभसखी या पीव्हीसी पाईप कंपनीत कामाला आहे. शनिवारी (दि. १३) त्याची रात्रपाळीची ड्यूटी होती. रात्री १० वाजता सतीश, पवन गणेश पाटील व अविनाश सुभाष दांडगे असे तिघेजण दुचाकीने जेवणाचा डबा घ्यायला कुसुंबा येथे गेले होते. तेथून परत येत असताना फातेमानगराच्या कॉर्नरजवळ चिकनच्या दुकानाजवळ आग लागल्याचे दिसल्याने तिघेजण तेथे थांबले असता तेथे पांढऱ्या कारमधून तसेच दुचाकीवरून काहीजण आले. त्यावेळी तिघेजण कंपनीत निघून गेले. त्यानंतर कार व दुचाकीस्वार त्यांच्यामागे आले. आग याच मुलांनी लावल्याचा संशय व्यक्त करून या लोकांनी अचानक रात्री ११.१५ वाजता दगडफेक केली. त्यानंतर कंपनीचे शटर उघडून आतमध्ये प्रवेश करून तोडफोड करून पवन पाटील, अविनाश दांडगे, मंगेश सुभाष पाटील, प्रवीण प्रल्हाद कुंभार, नितीन विठ्ठल पाटील व सतीश पाटील या कामगारांना रॉड व बॅटने मारहाण करायला सुरुवात केली. मालक नरेंद्र पाटील व पवन यांच्या दुचाकीची तोडफोड केली. घटनास्थळी दाखल झालेले कंपनीचे मालक नरेंद्र पाटील यांनाही या जमावाने रॉडने बेदम मारहाण केली. यात चौघेजण गंभीर जखमी झाल्याने त्यांना रुग्णालयात हलविण्यात आले.
सालार गटाचीही तक्रार
रेहान सालार याने दिलेल्या फिर्यादीनुसार, चुलत भाऊ साजीद सालारसोबत कारने (एमएच १९ सीव्ही ६५५५) फातेमानगरात काकूकडे गेले असता एमआयडीसीतील एस सेक्टरजवळील मराठे पाईपसमोर पाच ते सहाजणांनी हातात लाठ्या-काठ्या घेऊन कारवर दगडफेक केली. तेव्हा पाठीमागे भाऊ आमीर अब्दुल रज्जाक सालार हा एमएच १९ सीयू ३५२९ ही गाडी घेऊन जात असताना त्यांच्यावरही या लोकांनी दगडफेक केली. लोकांची गर्दी झाल्याचे पाहून हे लोक शुभसखी कंपनीकडे पळून गेल्याचे म्हटले आहे.