लोकमत न्यूज नेटवर्क
जळगाव : गेल्या काही दिवसांपासून शहरात दुचाकी चोरट्यांनी धुमाकूळ घातला आहे. दररोज एक किंवा दोन दुचाकी चोरीला जाण्याच्या घटना आता नित्याच्याच झाल्या आहेत. मंगळवारीसुद्धा गेंदालाल मिल व बजरंग कॉलनीतून दोन दुचाकी अज्ञात चोरट्यांनी चोरून नेल्याची घटना उघडकीस आली आहे. याप्रकरणी शहर व शनिपेठ पोलीस ठाण्‍यात गुन्हा दाखल करण्यात आला आहे.
चिकन घेण्यासाठी गेले, तोच दुचाकी झाली चोरी
शेख अकील शेख अजगर हे कुटुंबीयांसह भारत नगरात राहतात. भंगार विक्रीचा व्यवसाय करून ते कुटुंबीयांचा उदरनिर्वाह करतात. मंगळवारी रात्री ८.३० वाजता ते चिकन घेण्यासाठी गेंदालाल मिल भागातील लकी चहाच्या दुकानाजवळ आले होते. ८.४५ वाजताच्या सुमारास चिकन घेऊन ते दुचाकी (क्र. एमएच.१९.डी.सी.८१२२) उभ्या केलेल्या ठिकाणी आले असता, त्यांना दुचाकी चोरीला गेल्याचे दिसून आले. आजूबाजूला शोध घेऊनसुद्धा मिळून न आल्यामुळे ती चोरीला गेल्याची खात्री झाली, तसेच अजित रशिद पठाण (रा.गेंदालाल मिल) यानेच चोरी केल्याचा त्यांना संशय बळावला आहे. याबाबत त्यांनी पोलिसात तक्रार दाखल केली असून, त्यानुसार गुन्हा दाखल करण्यात आला आहे.
घरासमोरून दुचाकी लांबविली
नितीन लोटू चौधरी हे बजरंग कॉलनीत कुटुंबासह राहतात. त्यांनी त्यांची दुचाकी (क्र.एमएच.१९.बीपी.०१२६) ही सोमवारी रात्री घरासमोर उभी केली होती; मात्र मध्यरात्री अज्ञात चोरट्याने ती चोरून नेली. ही घटना मंगळवारी उघडकीस आल्यानंतर चौधरी यांनी शनिपेठ पोलीस ठाणे गाठत तक्रार दिली आहे. त्यानुसार गुन्हा दाखल करण्यात आला आहे.