लोकमत न्यूज नेटवर्क
मुक्ताईनगर : शहरात गेल्या काही दिवसांपासून भुरट्या चोऱ्यांची वाढ झाली असून चोरट्यांची हिम्मत वाढत चालली आहे. ९ मार्च रोजी येथील सागर किशोर दुधानी या युवकाच्या हातातील मोबाइल स्कूटीवर आलेल्या दोन अज्ञात चोरट्यांनी चोरून नेल्याची घटना घडली आहे.
सागर किशोर दुधानी (२८) यांनी मुक्ताईनगर पोलीस स्टेशनला दिलेल्या फिर्यादीत म्हटले आहे की, ९ मार्च रोजी जुना बोदवड रस्त्याला सायंकाळी साडेसात वाजेच्या सुमारास पायी फिरत असताना कंपनीच्या कामानिमित्त भ्रमणध्वनीवरून बोलत होता. त्याचवेळेस रस्त्यावर एकटाच चालत जात होता. सुमारे पावणेआठ वाजेच्या सुमारास सागर याच्यामागून तांबड्या रंगाची स्कूटी आली. त्यावर दोन अनोळखी इसम बसलेले होते.
चालक सडपातळ होता व त्यामागे बसलेला इसम यांनी काळ्या रंगाचे टोपीवाले जॅकेट घातले होते. त्यावर पांढऱ्या रंगाची गोल डिझाइन होती व त्याच्या तोंडाला काळ्या कलरचा मास्कदेखील बांधला होता. अशा दोन्ही इसमांनी सागर हा फोनवर बोलत असताना मोबाइल हातातून हिसकावून चोरून नेला. १५ हजार रुपये किमतीचा मोबाइल चोरून नेल्याप्रकरणी अज्ञात दोघांविरुद्ध मुक्ताईनगर पोलिसात गुन्हा दाखल करण्यात आला असून तपास पोलीस हेडकॉन्स्टेबल सादिक पटवे करत आहेत.
विशेष म्हणजे एकाच दिवशी दोन ते तीन ठिकाणी मोबाइल हिसकावून नेल्याची घटना घडल्याची माहिती मिळत आहे.