लंडन - लग्नाच्या हंगामातील अनेक कहाण्या व्हायरल होत असतात. अनेकदा वधू-वरांमधील गमती जमतींचे व्हिडीओ चर्चेचे केंद्र बनतात. अनेकदा वऱ्हाडी मंडळीही प्रसिद्धीच्या झोतात येतात. अशीच एक घटना समोर आली आहे. लग्नाच्या काही आठवडे आधी एक वधू ब्युटीपार्लरमध्ये गेली. तिथे तिने हेवी मेकअप करून घेतला. त्याचं बिल चाळीस हजारांहून अधिक झालं. मात्र ती ब्युटी पार्लरमधून पैसे न देताच गुपचूप फरार झाली.
वधू मंडपातून पसार झाल्याच्या अनेक कहाण्या तुम्ही ऐकल्या असतील. मात्र सदर तरुणी ब्युटी पार्लरमधून पैसे न देताच पसार झाली. ही घटना ब्रिटनमधील यॉर्क शहरात घडली आहे. मिळत असलेल्या माहितीनुसार एका महिलेचा विवाह होणार होता. मात्र तिच्या विवाहाला काही अवधी बाकी होता. मात्र तिने मेकअप करण्याचा निर्णय खूप आधी घेतला होता. ती तिच्या एका बहिणीसोबत ब्युटीपार्लरमध्ये पोहोचली. तिथे तिने मेकअप करवून घेतला.
तिच्या मेकअपचं बिल तब्बल ४० हजार रुपये झालं. ४० हजारांचा मेकअप करून घेतल्यावर ती बसून राहिली आणि संधी साधून तिथून पळून गेली. ब्युटी पार्लर चालवणाऱ्यांना जेव्हा याबाबत समजलं तेव्हा त्यांनी तिला संपूर्ण पार्लरभर शोधलं मात्र ती दिसली नाही. त्यानंतर सीसीटीव्हीमध्ये पाहिले असता ती मेकअपसह पैसे न देताच फरार झाली. आधी सर्वांनी तिची वाट पाहिली. मात्र जेव्हा ती आली नाही तेव्हा पार्लरवाल्यांनी सीसीटीव्ही फुटेजमधून तिचे फोटो छापून घेतले.
त्यानंतर पोलिसांकडे तक्रार करण्यात आली. पोलिसांनी आरोपी तरुणीचा शोध सुरू केला. या प्रकरणात पोलिसांकडून कुठलंही अधिकृत वक्तव्य समोर आलेलं नाही. मात्र मीडिया रिपोर्ट्सनुसार या तरुणीला पकडण्यात आले आहे. तसेच तिच्याकडून पैसे घेण्यात आले आहेत. दरम्यान, तिच्या लग्नाला अजूनही एक महिन्यानूत अधिक अवधी असल्याची माहिती उघड झाली आहे.