ऐनीचा तरुण ठार शेळपजवळ अपघात : निकालासाठी जाताना अपघाती मृत्यू; एक जखमी

राधानगरी : राधानगरी-फोंडा मार्गावर शेळपजवळ मोटारसायकल- ट्रकच्या अपघातात संजय बाबूराव कांबळे (वय २५, रा. ऐनी, ता. राधानगरी) हा महाविद्यालयीन युवक ठार झाला. त्याचा सहकारी दत्तात्रय एकनाथ देवकुळे (रा. चुये, ता. करवीर) हा जखमी झाला. आज सकाळी बाराच्या सुमारास हा अपघात झाला. राधानगरी पोलिसांतून मिळालेल्या माहितीनुसार, संजय कांबळे हा फोंडा येथील डी. एड्. कॉलेजमध्ये शिकत होता. परीक्षेचा निकाल आणण्यासाठी तो मित्र दत्तात्रयसह मोटारसायकलवरून फोंडा येथे निघाला होता, तर ट्रक गोव्याहून कोल्हापूरकडे जात होता. येथून पंधरा किलोमीटर अंतरावर शेळपजवळील वळणावर मोटारसायकल व ट्रकची समोरासमोर जोरदार धडक झाली. यामध्ये मोटारसायकलवरील दोघेही जखमी झाले. पोलिसांनी राधानगरी ग्रामीण रुग्णालयाच्या रुग्णवाहिकेतून त्यांना थेट कोल्हापूरला नेले. गंभीर जखमी झालेल्या संजय कांबळे याचे वाटेतच निधन झाले. दत्तात्रय देवकुळेवर सरकारी रुग्णालयात उपचार सुरू आहेत. मृत संजय अविवाहित असून माजी सरपंच बाबूराव कांबळे यांचा तो मुलगा होता. (प्रतिनिधी)