निपाणी : देशभरात वाढलेल्या महागाईविरोधात चिकोडी तालुका काँग्रेस, निपाणी ब्लॉक काँग्रेस व बेडकिहाळ ब्लॉक काँग्रेस यांच्यावतीने निपाणी शहरात सायकल रॅली काढण्यात आली. शनिवारी सकाळी ११ वाजता मध्यवर्ती शिवाजी महाराज चौकातून या सायकल रॅलीला प्रारंभ झाला. माजी आमदार काकासाहेब पाटील यांनी या रॅलीचे नेतृत्व केले. शिवाजी चौकातून प्रारंभ होऊन रॅली नेहरू चौक, गुरुवार पेठ, बसवेश्वर सर्कल, चिकोडी रोड, छत्रपती संभाजी सर्कल, नगरपालिका, बेळगाव नाका या मार्गावरून येऊन नाथ पै चौक येथे रॅलीची सांगता झाली.
यावेळी माजी आमदार काकासाहेब पाटील म्हणाले, केंद्र सरकारने पेट्रोल, डिझेल व खाद्यतेलाचे दर वाढवले असून, यामुळे सामान्य नागरिक हवालदिल झाले आहेत. सरकारच्या चुकीच्या धोरणांमुळे गरिबांचे कंबरडे मोडले आहे. यापूर्वी महागाईला विरोध करणारा भाजप यावेळी गप्प आहे. यामुळे सरकारविरोधात ही रॅली काढण्यात आली आहे.
यावेळी लक्ष्मणराव चिंगळे म्हणाले की, काँग्रेस प्रदेशाध्यक्ष डी. के. शिवकुमार, कार्याध्यक्ष सतीश जारकीहोळी व विरोधी पक्षनेते सिद्धरामय्या यांच्या आदेशानुसार ही रॅली काढण्यात आली आहे. सरकारेला जागे करण्यासाठी ही रॅली आहे. या रॅलीत बैलगाडी घेऊनही कार्यकर्ते सहभागी झाले होते. सायकल रॅलीत जिल्हा पंचायत सदस्य राजेंद्र वडर, माजी जिल्हा परिषद उपाध्यक्ष पंकज पाटील, निपाणी ब्लॉक काँग्रेस अध्यक्ष राजेश कदम, बेडकिहाल ब्लॉक काॅंग्रेस अध्यक्ष बसवराज पाटील, नगरसेवक विलास गाडीवडर, बाळासाहेब देसाई सरकार, दत्ता नाईक, संजय सांगावकर, डॉ. जसराज गिरे, शेरू बडेघर, सुनील पाटील, अस्लम शिकलगार, अनिस मुल्ला, दीपक सावंत, निकू पाटील, निपाणी शहर व ग्रामीण भागातही कार्यकर्ते मोठ्या संख्येने उपस्थित होते.
फोटो
निपाणी : काँग्रेस पक्षाच्यावतीने महागाईविरोधात काढलेल्या रॅलीचा प्रारंभ माजी आमदार काकासाहेब पाटील यांनी केला. यावेळी लक्ष्मणराव चिंगळे, राजेश कदम, राजेंद्र वडर, पंकज पाटील उपस्थित होते.
१७ निपाणी काँग्रेस रॅली