: लॉकडाऊन कालावधीत प्रथमच बाजारातील गर्दी कमी
लोकमत न्यूज नेटवर्क
इचलकरंजी : कोरोनाच्या पार्श्वभूमीवर येथील नगरपालिकेने आठवडा बाजारावर नियंत्रण आणण्यासाठी शुक्रवारी पहाटे वडगाव बाजार समितीसमोर भरलेले सौदे बंद केले. आठवडा बाजार ठिकाणी विक्रेत्यांना बसण्यासाठी व ग्राहकांना ये-जा करण्यासाठी पट्टे आखून दिले होते. त्यामुळे लॉकडाऊन कालावधीत प्रथमच बाजारातील गर्दी कमी झाल्याचे दिसत होते.
कोरोनाचा प्रादुर्भाव रोखण्यासाठी भाजीपाला विक्री व आठवडा बाजाराच्या ठिकाणी विशेष मोहीम राबवून गर्दी रोखण्यासाठी प्रयत्न केला. मात्र, त्याला नागरिकांचा प्रतिसाद मिळत नव्हता. शुक्रवारी पुन्हा आठवडा बाजार असल्याने नगरपालिकेने वडगाव बाजार समितीसमोर सुरू असलेले सौदे बंद केले. विकली मार्केट येथे भरणाऱ्या बाजाराच्या ठिकाणी विक्रेत्यांसाठी खास मांडणी केली होती. तसेच ये-जा करणाऱ्या नागरिकांसाठी मार्ग निश्चित केला होता. गर्दी न करता विक्रेत्यांनी भाजीपाल्याची मांडणी केली आणि ग्राहकही ये-जा करत होते.
दक्षतेचा भाग म्हणून विकली मार्केटमधील १२५ आणि झेंडा चौकात बसणाऱ्या २५ फळ, भाजीपाला विक्रेत्यांची अ‍ॅँटिजन तपासणी केली. त्यात सर्वांचा अहवाल निगेटिव्ह आला. प्रशासनाच्या नियोजनामुळे बाजारावरील गर्दीवर नियंत्रण आल्याचे दिसून आले.