प्रकाश पाटील
कोपार्डे : पाडळी खुर्द (ता. करवीर) येथे कडबा घेऊन आलेल्या ट्रकचा विद्युत वाहक तारेला स्पर्श झाल्याने ठिणग्या पडून ट्रक मधील कडब्याने पेट घेतली. आज, बुधवारी (दि.३) दुपारच्या सुमारास ही घटना घडली. कडक ऊन व वाऱ्याच्या झुळकेने आगीने क्षणात उग्र रूप धारण केले. यात ट्रकचे मोठे नुकसान झाले.घटनास्थळावरून मिळालेली माहिती अशी, पाडळीतील शेतकऱ्याला वैरणीचा कडबा देण्यासाठी हा ट्रक आला होता. पाडळी खुर्द गावाजवळ ट्रक नरसिंह तरुण मंडळाच्या बोर्ड जवळ आला असता विद्युत वाहकतारांना ट्रक मधील कडब्याचा स्पर्श झाला. यामुळे दोन विद्युत तारांचे घर्षण होऊन ट्रक मधील कडब्यावर मोठ्या प्रमाणात ठिणग्या पडल्या. यामुळे कडब्याला आग लागली. चालकाने प्रसंगावधान राखत ट्रक गावाबाहेर मोकळ्या जागेत नेला. दरम्यान ग्रामस्थांनी व बोंद्रे नगरमधील काही तरुणांनी आग विझवण्याचा प्रयत्न केला. पण आगीने भीषण रूप धारण केले होते. फुलेवाडी येथील अग्निशमन दलाला पाचारण करताच अग्निशमन दलाची गाडी घटनास्थळी आली. तरूणांनी ट्रक मधील कडबा ओढून खाली काढला. तर अग्निशमन दलाने आग विझवली. आगीत ट्रकसह कडबा बेचराख झाल्याने तीन लाखांचे नुकसान झाले आहे.