श्रीकांत ऱ्हायकर
लोकमत न्यूज नेटवर्क
धामोड : गेल्या चार दिवसांपासून तुळशीसह धामणी परिसरात पावसाने हजेरी लावली आहे. बुधवारी दिवसभर पावसाची संततधार सुरूच होती. गेल्या चार दिवसांपासून कोसळणाऱ्या पावसाने येथील ५६०३.२२५ सहस्र घनमीटर साठवण क्षमता असलेला मध्यम प्रकल्प बुधवारी सायंकाळी तुडुंब भरला. सद्या प्रकल्पाच्या उजव्या कालव्यातून पाण्याचा विसर्ग सुरू असून, अतिरिक्त पाणी या कालव्याद्वारे थेट तुळशी जलाशयात मिसळत आहे. परिणामी तुळशी धरणाच्या पाणीसाठ्यात वाढ होत असून, तुळशी धरण भरण्यास मदत होणार आहे.
बऱ्याच दिवसांच्या विश्रांतीनंतर तरण्या पावसाच्या नक्षत्राने दमदार हजेरी लावली आहे. परिसरात चार दिवसांपासून पावसाची रिपरिप सुरू झाली आहे. त्यामुळे शेतकरी वर्ग चांगलाच सुखावला आहे. गेल्या कित्येक दिवसांपासून पावसाअभावी खोळंबलेली रोप लावणीची कामे वेग घेत आहेत. केळोशी प्रकल्पाचे अतिरिक्त पाणी तुळशी तलावात मिसळत असल्याने तुळशीचा पाणीसाठा वाढण्यास मदत होणार आहे. चार दिवसांपासून सुरू झालेल्या पावसाने अर्धवट भरलेला हा प्रकल्प बुधवारी सायंकाळी पूर्ण क्षमतेने भरला. येथील बैलगोंड ओढ्यावर हा प्रकल्प अस्तित्वात आला असून, या प्रकल्पामुळे केळोशी, जाधववाडी, सुतारवडी, वळवंटवाडी, कुंभारवाडी, कुरणेवाडी, देऊळवाडीसह छोटया-मोठया वाड्या-वस्त्यांचा शेती सिंचनाचा प्रश्न निकाली निघाला आहे.
तुळशी धरण परिसरात २४ तासांत ५७ मि.मीटर इतक्या पावसाची नोंद झाली आहे. धरणात सद्या ४७ टक्के इतका पाणीसाठा झाला आहे. गतसाली आजआखेर धरण परिसरात ९५३ मि.मी. इतका पाऊस नोंदवला होता .चालू वर्षी यात वाढ होऊन हा आकडा ११६९ मिमी. इतका झाला आहे; पण पावसाच्या प्रमाणात वाढ झाली असली तरी गतसालपेक्षा धरणात यावर्षी ३ टक्के पाणी कमी असल्याचे जाणवते आहे.
फोटो ओळी - केळोशी बु. (ता. राधानगरी) येथील प्रकल्प पूर्ण क्षमतेने भरला असून, अतिरिक्त होणारे पाणी तुळशी जलाशयात मिसळत आहे.
छाया - श्रीकांत ऱ्हायकर