‘केएसए’ जिल्हा संघाची धुळे संघावर मात

आंतरजिल्हा फुटबॉल चॅम्पियनशिप

कोल्हापूर : धुळे येथे वेस्टर्न इंडिया फुटबॉल असोसिएशनतर्फे आंतरजिल्हा फुटबॉल चॅम्पियनशिप स्पर्धेचे आयोजन केले आहे. यामध्ये आज, बुधवारी कोल्हापूर स्पोर्टस् असोसिएशनच्या जिल्हा संघाने धुळे जिल्हा संघावर ४-० अशी मात केली. सामन्याच्या प्रारंभापासून ‘केएसए’ संघाने धुळे संघावर वर्चस्व निर्माण केले होते. पूर्वार्धात ३० व्या व ३२ व्या मिनिटास केएसएच्या आकाश भोसलेने रोहित कुरणेच्या पासवर गोल नोंदवीत २-० अशी आघाडी निर्माण केली होती. धुळे संघाने आघाडी कमी करण्याचा प्रयत्न केला मात्र त्यांना यात यश मिळाले नाही . उत्तरार्धातही केएसए संघाने आक्रमक खेळावरच भर दिला. त्यांच्या सुमित घाडगेने ५० व्या मिनिटाला मैदानी गोल नोंदविला. तर सामन्याच्या ६९ व्या मिनिटास रोहित पाटील याने मैदानी गोल नोंदवीत संघाची आघाडी ४-० अशी भक्कम निर्माण केली. यामुळे धुळे संघावर मोठा दबाव आला. सामन्याच्या निर्धारित वेळेत हीच आघाडी कायम राखत केएसए जिल्हा संघाने हा सामना ४-० अशा गोलफरकाने जिंकला. सामन्यात केएसएकडून शकील पटेल, अमृत हांडे, श्रेयस मोरे, माणिक पाटील, कपिल साठे यांनी उत्कृष्ट खेळाचे प्रदर्शन केले. या संघास प्रा. अमर सासने, राजेंद्र चौगुले यांचे मार्गदर्शन लाभले.