प्रियंका गांधींची आज कोल्हापुरात 'महाराष्ट्र स्वाभिमान' सभा, सभेची जय्यत तयारी

Maharashtra Assembly Election 2024 : या सभेची जय्यत तयारी करण्यात आली असून भव्य मंडपाची उभारणी करण्यात आली आहे. 

Maharashtra Assembly Election 2024 :  कोल्हापूर : जिल्ह्यातील महाविकास आघाडीच्या उमेदवारांच्या प्रचारार्थ अखिल भारतीय राष्ट्रीय काँग्रेस पक्षाच्या सरचिटणीस प्रियंका गांधी यांची आज, शनिवार दुपारी अडीच वाजता गांधी मैदान येथे 'महाराष्ट्र स्वाभिमान' सभा होणार आहे. या सभेची जय्यत तयारी करण्यात आली असून भव्य मंडपाची उभारणी करण्यात आली आहे. 

आमदार सतेज पाटील यांनी गांधी मैदान येथे भेट देऊन पाहणी केली. विधानसभा निवडणुकीच्या निमित्ताने काँग्रेस नेत्या प्रियंका गांधी यांची तोफ प्रथमच कोल्हापुरात धडाडणार आहे. खासदार शाहू महाराज छत्रपती, कोल्हापूर जिल्हा काँग्रेसचे अध्यक्ष आमदार सतेज पाटील यांच्यासह इंडिया आघाडी आणि महाविकास आघाडीचे प्रमुख नेतेमंडळी तसेच जिल्ह्यातील महाविकास आघाडीचे सर्व उमेदवार या सभेला उपस्थित राहणार आहेत. 

सभेच्या नियोजनासंदर्भात आमदार सतेज पाटील यांनी शुक्रवारी (दि.१५) गांधी मैदान येथे महाविकास आघाडीच्या प्रमुख पदाधिकाऱ्यांसोबत पाहणी करून चर्चा केली. सभेला येणाऱ्यांची बैठक व्यवस्था, मंडप उभारणी, सभेच्या ठिकाणी येणाऱ्या वाहनांची पार्किंग व्यवस्था याची माहिती घेऊन नियोजनासंदर्भात सूचना केल्या. कार्यकर्त्यांना नवी ऊर्जा मिळणार असून हजारोंच्या संख्येने उपस्थित राहून ही सभा यशस्वी करण्याचे आवाहन सतेज पाटील यांनी केले.