दत्तवाड : महाराष्ट्रात कोरोनाच्या वाढत्या रुग्णसंख्येमुळे कर्नाटक शासनाने महाराष्ट्रातून येणारे मार्ग बुधवारी दुपारी बंद केले. पंधरा दिवसांपूर्वी हे मार्ग सात दिवसांसाठी बंद करण्यात आले होते; पण पुन्हा या मार्गावरून वाहतूक सुरू झाली होती. बुधवारी कर्नाटक प्रशासनाने राज्यांना जोडणारे सर्व मार्ग बंद केले.
शिरोळ तालुक्याच्या दक्षिणेला असणारा राजापूर बंधारा या राजापूर-मंगावती मार्गावर जेसीबीने चर काढून मार्ग बंद करण्यात आले तर दत्तवाड - सदलगा या आंतरराज्य मार्गावर असणाऱ्या दुधगंगा नदीवरील पुलावर मुरूम व काटे टाकून मार्ग बुधवारी दुपारी बंद करण्यात आला. याबरोबर दानवाड-एकसंबा यादरम्यान असणारा मार्गदेखील बंद करण्यात आला आहे, तर दत्तवाड-मलिकवाड व दत्तवाड-एकसंबादरम्यान असणाऱ्या कोल्हापूर पद्धतीच्या बंधाऱ्यावरील मार्गदेखील बंद करण्यात आले आहेत. पुढील आदेश होईपर्यंत हे मार्ग बंद राहणार असल्याची माहिती सदलगा येथून देण्यात आली.
फोटो - २१०४२०२१-जेएवाय-०५
फोटो ओळ - राजापूर-मंगावती मार्ग जेसीबीच्या साह्याने चर काढून बंद करण्यात आला आहे.