फुलेवाडी^-पीटीएम आज झुंजणार

‘फुलेवाडी’ची ‘प्रॅक्टिस’वर मात: नेताजी चषक फुटबॉल स्पर्धा

कोल्हापूर : नेताजी चषक फुटबॉल स्पर्धेतील मंगळवारी झालेल्या अत्यंत चुरशीच्या दुसऱ्या उपांत्य सामन्यात फुलेवाडी फुटबॉल क्रीडा मंडळाने प्रॅक्टिस फुटबॉल क्लब ‘अ’वर २-१ अशा गोलफरकाने मात करीत अंतिम सामन्यात धडक मारली. आज, बुधवारी फुलेवाडी फुटबॉल क्रीडा मंडळ विरुद्ध पीटीएम ‘अ’ यांच्यामध्ये अंतिम लढत होणार आहे. शाहू स्टेडियमवर दुसरा उपांत्य फेरीतील सामना पाहण्यासाठी फुटबॉल शौकिनांनी मोठी गर्दी केली होती. दोन्ही संघांनी सामन्याच्या पहिल्या मिनिटापासूनच खाते उघडण्यासाठी शर्थीचे प्रयत्न सुरू केले. यामध्ये प्रॅक्टिस फुटबॉल क्लबकडून झालेल्या खोलवर चढाईमध्ये शकील पटेलने मारलेले चेंडू फुलेवाडीचा गोलरक्षक निखिल खाडेने उत्कृष्टरीत्या बाहेर काढल्याने त्यांची संधी हुकली. पुढच्या मिनिटाला फुलेवाडी संघाकडून रोहित मंडलिकच्या पासवर जयसन वाझची संधी हुकली. ४० व्या मिनिटाला सूरज शिंगटेच्या पासवर तेजस जाधवने गोल करीत संघाचे खाते उघडले. मध्यंतरापर्यंत फुलेवाडी फुटबॉल क्रीडा मंडळ १-० अशा गोलफरकाने आघाडीवर होते. उत्तरार्धात अत्यंत वेगवान झालेल्या सामन्यात ४७ व्या मिनिटाला फुलेवाडी संघाच्या तेजस जाधवच्या पासवर जयसन वाझने अचूक गोल करीत सामन्यात २-० अशी आघाडी घेतली. या गोलनंतर फुलेवाडी संघाने थोडी बचावात्मक खेळी करण्यास सुरुवात केली. प्रॅक्टिस संघाने याचा फायदा घेत जोरदार खोलवर चढाया करण्यास सुरुवात केली. यामध्ये सागर चिले, इंद्रजित मोंडल, शकील पटेल, राहुल पाटील यांच्या आक्रमक खेळीमुळे फुलेवाडी संघातील बचावफळीतील खेळाडूंची दमछाक झाली. ७४ व्या मिनिटाला प्रॅक्टिस फुटबॉल क्लबच्या इंद्रजित मोंडलने गोल करीत संघाचे खाते उघडले. या गोलनंतर प्रॅक्टिस संघाचा आत्मविश्वास वाढला. त्यांनी आक्रमक खेळी करण्यास सुरुवात केली. यामध्ये सागर चिले, संदीप पोवारची संधी हुकली. प्रॅक्टिस संघाला ही आघाडी कमी न करता आल्याने ‘फुलेवाडी’ संघाने २-१ अशा गोलफरकाने विजय मिळविला. पुन्हा हुल्लडबाजी....प्रॅक्टिस-फुलेवाडी यांच्यातील उपांत्य सामना पाहण्यासाठी मोठ्या प्रमाणात फुटबॉल शौकि नांनी गर्दी केली होती. या सामन्यातही पंचांच्या काही निर्णयांवर संघाचे समर्थक पंचांना अर्वाच्च शिवीगाळ करीत होते. ही शिवीगाळ सुरू राहिल्याने पोलिसांनी प्रेक्षक गॅलरीत धाव घेताच या समर्थकांनी पळ काढला. मात्र पोलिसांनी सीसीटीव्ही कॅमेरे पाहून या हुल्लडबाजांवर कारवाई करावी, अशी मागणी ज्येष्ठ नागरिकांमधून होत आहे.शाहू स्टेडियमवर नेताजी चषक फुटबॉल स्पर्धेतील सामन्यात मंगळवारी झालेल्या अत्यंत चुरशीच्या झालेल्या सामन्यात फुलेवाडीच्या खेळाडूंनी मारलेला चेंडू ‘प्रॅक्टिस’चा गोलरक्षक अल्फाज हकीमने उत्कृ ष्टरीत्या बाहेर काढला.