पोलीस निरीक्षक अशोक भवड यांची मुख्यालयाकडे बदली

पोलीस निरीक्षक भवड यांची हातकणंगले पोलीस ठाण्यात रुजू झाल्यापासून कारकिर्द ही वादग्रस्त बनली होती. पोलीस ठाण्याच्या हद्दीत मटका, गुटखा, गावठी दारू यांसह अवैध व्यवसाय जोमात सुरू होते. पोलीस ठाण्याच्या हद्दीत सुरू असणाऱ्या अवैध व्यवसायांवर अनेक वेळा वरिष्ठ अधिकाऱ्यांनी छापा टाकत मुद्देमालासह आरोपींना अटक केली होती; तर काही दिवसांपूर्वी येथील वेश्या अड्ड्यावरील धाडसत्र हातकणंगले पोलिसांच्या अंगलट आले होते. यातच या प्रकरणामधील दलालासोबत पोलिसांचे फोटो प्रसारित झाल्याने त्यांचे लागेबंधे उघड झाले होते. या सगळ्याचा ठपका ठेवत जिल्हा पोलीसप्रमुख शैलेश बलकवडे यांनी अशोक भवड यांची सोमवारी बदली केली. त्यांचा कार्यभार पोलीस उपनिरीक्षक प्रवीण पाटील यांच्याकडे दिला आहे.