‘बालगोपाल’ उपांत्य फेरीत

अस्मिता चषक फुटबॉल स्पर्धा : ‘साईनाथ’चा ३-१ ने पराभव

कोल्हापूर : बालगोपाल तालीम मंडळाने साईनाथ स्पोर्टस्वर ३-१ अशी सहज मात करीत अस्मिता फुटबॉल स्पर्धेची उपांत्य फेरी गाठली. सामन्यात ऋतुराज पाटील, रोहित कुरणे, अशिष कुरणे यांनी चमकदार कामगिरी केली. शाहू स्टेडियम येथे बुधवारी झालेल्या उपांत्यपूर्व फेरीच्या सामन्यात प्रारंभापासून बालगोपाल संघाचे वर्चस्व राहिले. बालगोपालकडून सूरज जाधव, सचिन गायकवाड, अजित पोवार, आकाश भोसले, जयकुमार पाटील यांनी आक्रमक खेळाचे प्रदर्शन केले. १५ व्या मिनिटास बालगोपालच्या सूरज जाधवच्या पासवर ऋतुराज पाटील याने गोल करीत सामन्यात आपल्या संघास १-० अशी आघाडी मिळवून दिली. साईनाथकडून नीलेश साळोखे, ऋषिकेश पाटील, अभिजित चौगले, प्रसाद पाटील, निखिल तिबिले, ओंकार खोत यांनी सामन्यात बरोबरी साधण्याचा आटोकाट प्रयत्न केला. मात्र, त्यांना यश आले नाही. ३५ व्या मिनिटास अशिष कुरणे याने गोल नोंदवीत आघाडी २-० अशी केली. उत्तरार्धात बालगोपाल संघ आघाडी वाढविण्याच्या हेतूने, तर साईनाथ संघ सामन्यात बरोबरी करण्याच्या उद्देशाने मैदानात उतरला. ४८ व्या मिनिटास बालगोपालच्या सूरज जाधवच्या पासवर रोहित कुरणेने गोल नोंदवीत आपल्या संघाची ३-० अशी आघाडी वाढविली. ७२ व्या मिनिटास बालगोपाल संघाच्या पेनल्टी क्षेत्रात गोलरक्षक अक्षय कुरणे याने साईनाथचा आघाडीवीर ऋषिकेश पाटील याला धोकादायकरीत्या अडविले. याबद्दल मुख्य पंचांनी साईनाथ संघास पेनल्टी बहाल केली. यावर ऋषिकेश पाटीलने गोल नोंदवीत सामन्यात ३-१ने आघाडी कमी केली. अखेरपर्यंत बालगोपाल संघाकडून सामन्यावर वर्चस्व राहिल्याने सामना बालगोपाल संघाने ३-१ असा जिंकत स्पर्धेची उपांत्य फेरी गाठली. (प्रतिनिधी)