कोल्हापूर : शहरातील नागरिकांना भोगवटा प्रमाणपत्रे जलदगतीने मिळावीत, त्यांचा वेळ वाचावा या हेतूने महानगरपालिका नगररचना विभागामार्फत आज, गुरुवारी व उद्या, शुक्रवारी भोगवटा प्रमाणपत्रासाठी विशेष कॅम्पचे आयोजन करण्यात आले आहे.
शासन निर्णयानुसार नगररचना विभागाकडून बांधकाम परवानगी, भोगवटा व विकास कामे मंजुरी ऑनलाईन पद्धतीने देण्यात येत आहेत. यापूर्वी सादर करण्यात आलेली भोगवटा प्रमाणपत्र प्रकरणे ऑफलाईन पद्धतीने देण्याचे कामकाज सुरू होते. त्यामुळे जी प्रकरणे दि. ५ मे पूर्वी ऑफलाईन पद्धतीने नगररचना विभागाकडे सादर झालेली आहेत. अशा प्रकरणांची भोगवट्याची कामे जलद गतीने करण्यासाठी प्रशासक डॉ. कादंबरी बलकवडे यांनी नगररचना विभागामध्ये विशेष कॅम्प आयोजित करण्याचे आदेश दिले आहेत.
यावेळी या प्रकरणामधील त्रुटींची पूर्तता करून सर्व प्रकरणे निकाली काढण्याबाबत निर्देश त्यांनी दिलेले आहेत. या अनुषंगाने नगररचना विभागामार्फत आज, गुरुवारी व उद्या शुक्रवारी कोविड नियमांचे पालन करून कार्यालयीन वेळेत ऑफलाईन भोगवटा परवानगीसाठी विशेष कॅम्पचे आयोजन करण्यात आले आहे. संबंधितांनी या कॅम्पचा लाभ घ्यावा, असे आवाहन नगररचना विभागामार्फत करण्यात आले आहे.