उद्धव ठाकरे यांची २८ आॅक्टोबरला सभा

रामदास कदम यांची उपस्थिती : आदित्य ठाकरेंचा रोड शो; सेनेकडून प्रचाराचे नियोजन

कोल्हापूर : महानगरपालिका निवडणुकीच्या प्रचारात शिवसेनेच्या दिग्गजांच्या तोफा धडाडणार आहेत. यात सेना कार्याध्यक्ष उद्धव ठाकरे, पर्यावरणमंत्री रामदास कदम आणि युवासेना अध्यक्ष आदित्य ठाकरे, सेनेच्या उपनेत्या व आमदार नीलम गोऱ्हे, आदींचा समावेश आहे. कार्याध्यक्ष ठाकरे यांची जाहीर सभा २८ आॅक्टोबरला सायंकाळी सहा वाजता पेटाळा मैदान येथे होणार असल्याची माहिती आमदार राजेश क्षीरसागर व जिल्हाप्रमुख संजय पवार यांनी दिली.उमेदवारी अर्ज भरल्यानंतर छाननी, चिन्हवाटपाची प्रक्रिया पूर्ण झाल्यावर साधारणत: आॅक्टोबरच्या तिसऱ्या आठवड्यात प्रचाराची रणधुमाळी उडणार आहे. जोरदार प्रचाराद्वारे मतदारांपर्यंत पोहोचण्याचे नियोजन सेनेने केले आहे. त्यानुसार मुंबईतील सेनाभवनाकडून दिग्गजांच्या सभांचे नियोजन कोल्हापूरच्या पदाधिकाऱ्यांना मिळाले आहे. यात सेनेच्या उपनेत्या आमदार नीलम गोऱ्हे यांच्या १७ व १८ आॅक्टोबरला सभा होतील. त्यानंतर २५ आॅक्टोबरला युवासेना अध्यक्ष आदित्य ठाकरे यांचा रोड शो होईल. कार्याध्यक्ष उद्धव ठाकरे यांची २८ आॅक्टोबरला जाहीर सभा होईल. पर्यावरणमंत्री रामदास कदम यांची २९ रोजी सभा होणार असल्याची माहिती आमदार क्षीरसागर व जिल्हाप्रमुख पवार यांनी सांगितले. (प्रतिनिधी)