धामोड - धामोड (ता राधानगरी) येथे होत असलेल्या ग्रामपंचायत निवडणुकीचे मतदान चुरशीने सुरू आहे. सकाळच्या सत्रात मतदारांनीही मतदान केंद्रावर गर्दी केली होती. पण दुपारी बारा वाजण्याच्या सुमारास अचानक तीन प्रभागातील मतदान यंत्रे बंद पडल्यामुळे मतदान केंद्रावर कांही काळ तणाव निर्माण झाला होता. पण निवडणूक विभागाच्या स्वतंत्र टीमने तात्काळ नवीन मशीन उपलब्ध करून दिल्याने तणाव निवळला व मतदान सुरळीत चालू झाले.
धामोड ग्रुप ग्रामपंचायती अंतर्गत पाच प्रभाग येत असून मतदान सुरू झाल्यानंतर पहिल्या टप्प्यात प्रभाग क्रमांक एक व प्रभाग क्रमांक चार मधील मतदान यंत्रे बंद पडली होती. पण निवडणुक विभागाने तात्काळ मशीन बदलल्याने मतदान पुर्ववत सुरू झाले. पण येथील अतिसंवेदनशिल असलेल्या प्रभाग क्रमांक पाचमधील मतदान यंत्र बंद पडल्यानंतर रांगेत उभा असलेल्या मतदारांनी व दोन्ही गटाच्या उमेदवारांकडून तीव्र संताप व्यक्त करण्यात आला. त्यामुळे येथील सर्वच मतदान केंद्रांवर मतदारांच्या लांबच लांब रांगा लागल्या होत्या. मतदान यंत्रातील दोषांमुळे मतदारांना ताटकळत उभे राहावे लागत आसल्याने मतदारांत थोडी नाराजी होती. मशीन बदलल्यानंतर येथील पाचही प्रभागात मतदान प्रक्रिया शांततेत सुरु झाली.