म्हाकवे : हमिदवाडा (ता. कागल) येथील सदाशिवराव मंडलिक साखर कारखान्याच्या गळीत हंगामाची सांगता करण्यात आली. यावेळी उत्पादित १लाख ०७ हजार साखर पोत्यांचे पूजन कारखान्याचे उपाध्यक्ष बंडोपंत चौगुले, संचालकांच्या हस्ते करण्यात आले.
या हंगामामध्ये १२८ दिवसांत ५ लाख ४०हजार ८०१ मेट्रिक टन ऊसाचे गाळप होऊन ६ लाख ७७ हजार क्विंटल साखर पोती उत्पादन झाले. यंदा १२.५१ टक्के इतका साखर उतारा मिळाला आहे. यंदा कार्यक्षेत्रातून ४ लाख १ हजार ३३० मेट्रिक टन तर गेटकेनेमधून ५६ हजार ९२५ व कर्नाटकमधून ८२ हजार ५४५ मेट्रिक टन इतका ऊस गळीतासाठी उपलब्ध झाला .को-जनरेशन प्रकल्पातून एकूण ३ कोटी ७४ लाख ६२ हजार ९४९ युनिट वीजनिर्मिती झाली. त्यापैकी २ कोटी २० लाख ०५ हजार ६५३ इतकी युनिट वीज ही महावितरण कंपनीस निर्यात केली. एक कोटी ५२ लाख ५८ हजार २९६ युनिटस् कारखान्यासाठी वापरण्यात आली.
लोकनेते सदाशिवराव मंडलिक यांनी घालून दिलेल्या आदर्शाप्रमाणे आणि अध्यक्ष संजय मंडलिक यांच्या कुशल नेतृत्वाखाली कारखान्याची यशस्वी वाटचाल सुरू आहे. सर्व संचालक, अधिकारी, कर्मचारी शेतकरी, कंत्राटदार, ऊसतोड मजूर यांच्या सहकार्यामुळे हा हंगाम यशस्वी झाला. याबाबत बंडोपंत चौगुले यांनी सर्वांप्रती कृतज्ञता व्यक्त केली.
संचालक प्रकाश पाटील व त्यांच्या पत्नी माजी जिल्हा परिषद सदस्या प्रभावती पाटील या उभयंतांच्या हस्ते सत्यनारायण पूजा बांधण्यात आली. संचालक आप्पासो तांबेकर, शहाजी यादव, मारुती काळूगडे, मसू पाटील, दतात्रय चौगले, दत्तात्रय सोनाळकर, नंदकुमार घोरपडे, संचालिका राजश्री चौगले, कार्यकारी संचालक एन. वाय. पाटील, सर्जेराव पाटील आदी उपस्थित होते.
२२ मंडलिक
सदाशिवराव मंडलिक कारखान्यातील साखर पोत्यांचे पूजन करताना उपाध्यक्ष बंडोपंत चौगुले. यावेळी संचालक उपस्थित होते.