Vidhan Sabha Election 2024: कोल्हापूर जिल्ह्यात महायुतीचा डंका, काँग्रेसचा सुपडासाफ

शिंदेसेनेची ताकद वाढली..

विश्वास पाटील

कोल्हापूर : कोल्हापूर जिल्ह्याच्या राजकारणात आतापर्यंतच्या इतिहासात महायुतीने सर्वाधिक दणदणीत यश मिळविले. काँग्रेससह महाविकास आघाडीचा सुपडासाफ झाला. जिल्ह्यातील सर्व १० जागा महायुतीने जिंकल्या आहेत. काँग्रेस तिसऱ्यांदा शून्यावर आपटली. भल्याभल्यांचा निकालाचा अंदाज चुकवत जनतेने अत्यंत स्पष्ट कौल दिला. कोल्हापूर उत्तर, करवीर आणि शाहुवाडी मतदार संघात सुरुवातीला थोडी चुरस झाली. उर्वरित सात मतदारसंघांत पहिल्या फेरीपासूनच महायुतीच्या उमेदवारांनी घेतलेली आघाडीच गुलाल लावूनच थांबली.

मावळत्या सभागृहात महायुतीचे सहा आमदार होते. काँग्रेसचे चार संख्याबळ होते. या निवडणुकीत काँग्रेसच्या चारही आमदारांचा दारुण पराभव झाला. महायुतीतील राष्ट्रवादी अजित पवार पक्षाचे आमदार राजेश पाटील चंदगडमधून पराभूत झाले, परंतु तिथे महायुतीतीलच भाजप समर्थक शिवाजी पाटील हे अपक्ष उमेदवार निवडून आले. लोकसभा निवडणुकीत कोल्हापूरच्या जागेवर शाहू छत्रपती चांगल्या मताधिक्याने विजयी झाले होते. हातकणंगलेतही सत्यजीत पाटील निसटत्या मतांनी पराभूत झाले होते. त्यामुळे विधानसभेला लोक काय करतात, याबाबत प्रचंड उत्सुकता होती, परंतु लोकांनी एकतर्फीच महायुतीच्या पारड्यात मते टाकली.

पालकमंत्री हसन मुश्रीफ यांनी सलग सहाव्यांदा निवडून येत विजयाची डबल हॅट्ट्रिक केली, असे सलग सहा वेळा निवडून येणारे ते एकमेव आमदार आहेत. स्वत: शरद पवार यांनी गडहिंग्लजमध्ये येऊन मुश्रीफ यांना पाडा, असे तीन वेळा जाहीर करून मुश्रीफ यांनी विजय खेचून आणला व कागलचे परमनंट आमदार आपणच असल्याचे दाखवून दिले. येथे समरजीत घाटगे यांचा सलग दुसऱ्यांदा जिव्हारी लागणारा पराभव झाला.

राधानगरीत प्रकाश आबिटकर यांनी त्या मतदारसंघात प्रथमच विजयाची हॅट्ट्रिक केली. शिंदेसेना विरुद्ध उद्धवसेना या लढाईत आबिटकर यांनी के.पी.पाटील यांचा मोठ्या मताधिक्याने पराभव केला. इचलकरंजीत भाजपच्या राहुल आवाडे यांनी शरदचंद्र पवार पक्षाच्या मदन कारंडे यांचा पराभव करून इचलकरंजीच्या राजकारणातील आवाडे घराण्याचा आणि भाजपचा वरचष्मा पुन्हा अधोरेखित केला. राहुल हे पहिल्याच प्रयत्नात आमदार झालेले जिल्ह्यातील या निवडणुकीतील एकमेव आमदार आहेत.

कोल्हापूर उत्तरची लढत राज्यात गाजली होती. तिथे काँग्रेस पुरस्कृत राजेश लाटकर यांनी चांगली लढत दिली, परंतु शिंदेसेनेचे नेते राजेश क्षीरसागर यांनी त्यांचा पराभव केला. कोल्हापूर दक्षिणमध्ये भाजपच्या अमल महाडिक यांनी काँग्रेसच्या आमदार ऋतुराज पाटील यांचा एकतर्फीच पराभव केला. तिथे आमदार सतेज पाटील विरुद्ध महाडिक अशी लढत झाली, परंतु त्यात महाडिक गटाने गुलाल खेचून आणला.

करवीरमध्ये काँग्रेसचे दिवंगत आमदार पी.एन.पाटील यांच्या निधनाबद्दलची सहानुभूती कामी आली नाही. या एकमेव मतदारसंघात राहुल पाटील यांनी जोरदार टक्कर दिली, परंतु शिंदेसेनेच्या चंद्रदीप नरके यांनी अखेर बाजी जिंकली. शाहुवाडीत जनसुराज्य शक्ती पक्षाचे आमदार विनय कोरे यांनी उद्धवसेनेच्या सत्यजीत पाटील यांचा पराभव करून आपणच या मतदारसंघाचे सावकर असल्याचे दाखवून दिले. सत्यजीत यांना लोकसभेपाठोपाठ दुसऱ्या दारुण पराभवास सामोरे जावे लागले.

चंदगडमध्ये पंचरंगी लढत झाली, परंतु तिथे महायुती समर्थक अपक्ष उमेदवार शिवाजी पाटील यांनी महायुतीतीलच राष्ट्रवादी अजित पवार पक्षाचे आमदार राजेश पाटील, शरदचंद्र पवार पक्षाच्या डॉ.नंदिनी बाभूळकर यांचा पराभव केला. शिवाजी पाटील हे उपमुख्यमंत्री देवेंद्र फडणवीस यांचे समर्थक आहेत.

हातकणंगलेत जनसुराज्य शक्तीच्या अशोकराव माने यांनी काँग्रेसच्या राजूबाबा आवळे यांचा पराभव केला. तिथे स्वाभिमानीचे माजी आमदार डॉ.सुजीत मिणचेकर हे तिसऱ्या स्थानावर फेकले गेले. शिरोळला महायुती पुरस्कृत राजेंद्र पाटील यड्रावकर यांनी काँग्रेसच्या गणपतराव पाटील यांचा दणदणीत पराभव केलाच, शिवाय राजू शेट्टी यांचे उमेदवार उल्हास पाटील यांचेही राजकारणच संपुष्टात आणले.

विजयी बलाबल

• शिंदेसेना : ०३
• भाजप : ०२
• जनसुराज्य शक्ती : ०२
• राष्ट्रवादी अजित पवार पक्ष : ०१
• महायुती पुरस्कृत शाहू आघाडी : ०१
• महायुती समर्थक अपक्ष : ०१

२०१९ चे बलाबल

• काँग्रेस : ०४
• राष्ट्रवादी : ०२
• शिंदेसेना : ०१
• जनसुराज्य शक्ती : ०१
• अपक्ष : ०२

शिंदेसेनेची ताकद वाढली..

• मुश्रीफ यांची डबल हॅट्ट्रिक, असे यश मिळविणारे ते जिल्ह्यातील पहिलेच आमदार
• इतिहास घडविला, प्रकाश आबिटकर यांची हॅट्ट्रिक
• विनय कोरे यांच्या पक्षाला दोन ठिकाणी लखलखीत यश
• उद्धवसेना, शरद पवार पक्षाला भोपळा
• भाजपला पुन्हा घवघवीत यश
• महाडिक गटाचा दबदबा वाढला
• राजू शेट्टी लोकसभेपाठोपाठ विधानसभेलाही झाले रिकामेच
• आमदार सतेज पाटील यांच्या राजकारणाची पिछेहाट

काँग्रेसचा नामुष्कीजनक पराभव..

स्वातंत्र्यानंतर झालेल्या १९५७च्या निवडणुकीत संयुक्त महाराष्ट्राच्या आंदोलनाच्या पार्श्वभूमीवर काँग्रेस जिल्ह्यातून हद्दपार झाली होती. तशीच स्थिती २०१४ ला पुन्हा झाली. दहा वर्षांनंतर २०२४ ला लढविलेल्या सर्व पाचही जागांवर काँग्रेसचा नामुष्कीजनक पराभव झाला.

विधानसभानिहाय विजयी उमेदवारांचे मताधिक्य

• इचलकरंजी : राहुल आवाडे : ५६८११
• हातकणंगले : अशोकराव माने : ४६२४९
• शिरोळ : राजेंद्र पाटील-यड्रावकर : ४०८१६
• राधानगरी : प्रकाश आबिटकर : ३८२५९
• शाहूवाडी : विनय कोरे : ३६०५३
• कोल्हापूर उत्तर : राजेश क्षीरसागर-२९५६३
• चंदगड : शिवाजी पाटील- २४१३४
• कोल्हापूर दक्षिण : अमल महाडिक - १७६३०
• कागल : हसन मुश्रीफ : ११५८१
• करवीर : चंद्रदीप नरके : १९७६