उदगीर : तालुक्यातील ६१ पैकी ६ ग्रामपंचायती बिनविरोध निघाल्यामुळे आता ५५ गावांत निवडणुका होत आहेत. पुढील आठवड्यात मतदान असल्याने गावपातळीवरील राजकीय वातावरण तापले आहे. बहुतांश ठिकाणी, दुरंगी, तिरंगी लढती होत असल्याचे पाहावयास मिळत आहे. गावावर आपले वर्चस्व निर्माण करण्यासाठी स्थानिक नेतेमंडळींची प्रतिष्ठा पणाला लागली आहे. या निवडणुकीत नवख्या चेहऱ्यांना संधी देण्यात आली आहे.
तालुक्यातील रुद्रवाडी, टाकळी (वा.), धडकनाळ, जकनाळ, डांगेवाडी व क्षेत्रफळ या सहा ग्रामपंचायती बिनविरोध निघाल्या आहेत. अवलकोंडा, आडोळवाडी, आरसनाळ, इस्मालपूर, एकुर्का रोड, करखेली, करडखेल, करवंदी, कासराळ, किनी यल्लादेवी, कुमठा (खु.), कुमदाळ उदगीर, कुमदाळ हेर, कोदळी, कौळखेड, खेर्डा (खु.), गंगापूर, गुडसूर, गुरधाळ, चांदेगाव, चिघळी, जानापूर, डाऊळ हिप्परगा, डोंगरशेळकी, तादलापूर, दावणगाव, धोंडीहिप्परगा, नळगीर, निडेबन, पिंपरी, बामणी, बेलसकरगा, बोरगाव (बु.), भाकसखेडा, मल्लापूर, मांजरी, मादलापूर, माळेवाडी, येणकी, लिंबगाव, लोणी, लोहारा, वागदरी, वाढवणा (बु.), वाढवणा (खु.), शिरोळ जानापूर, शेल्हाळ, सुमठाणा, हंगरगा कुदर, हंडरगुळी, हकनकवाडी, हाळी, हिप्परगा डाऊळ, हेर, होनीहिप्पगा आदी ५५ गावांत १५ रोजी मतदान होणार आहे.
या निवडणुकीत आपल्या पॅनलचे वर्चस्व निर्माण व्हावे म्हणून सर्वच पॅनल प्रमुखांनी जोरदार फिल्डिंग लावली आहे. त्यामुळे गावागावात चुरशीच्या व लक्षवेधी लढती होणार आहेत. दरम्यान, गावागावात प्रचाराला सुरुवात झाली आहे.
दिग्गज मंडळींची लागली कसोटी...
ग्रामपंचायत निवडणूक ही दिग्गज नेतेमंडळींच्या गावात होत असल्यामुळे या मंडळींची कसोटी लागली आहे. भाजपचे प्रदेश उपाध्यक्ष तथा माजी आ. गोविंद केंद्रे, जिल्हा परिषद अध्यक्ष राहुल केंद्रे, राष्ट्रवादी युवक काँग्रेसचे जिल्हा उपाध्यक्ष सुनील केंद्रे (कुमठा खु.), काँग्रेसचे तालुकाध्यक्ष तथा बाजार समितीचे संचालक कल्याण पाटील (हाळी), भाजपचे प्रदेश सचिव नागनाथ निडवदे, बाजार समितीचे संचालक पद्माकर उगिले (नळगीर), माजी समाजकल्याण सभापती मधुकर एकुर्केकर (एकुर्का रोड), बाजार समितीचे संचालक संतोष बिरादार (किनी यल्लादेवी), महिला व बालकल्याण सभापती ज्योतीताई राठोड, जि. प. सदस्य बसवराज पाटील कौळखेडकर (कौळखेड), माजी पं. स. सभापती सत्यकला गंभिरे (करवंदी), पं. स. सभापती प्रा. शिवाजीराव मुळे, जि. प. सदस्या आशाताई ज्ञानेश्वर पाटील (दावणगाव), माजी पं. स. सभापती संगम आष्टुरे, माजी पं. स. सदस्य दत्तात्रय बामणे (वाढवणा बु.), पं. स. उपसभापती बाळासाहेब मर्लापल्ले (डोंगरशेळकी), माजी पं. स. उपसभापती रामदास बेंबडे, राष्ट्रवादी युवक काँग्रेसचे तालुकाध्यक्ष रोहिदास कुंडगीर (इस्मालपूर) आदींची कसोटी लागली आहे.